Gujarati News

અમદાવાદમાં ગટરના તેમજ કેમિકલ યુક્ત પાણી આડેધડ સાબરમતી નદીમાં ઠલવાતા નદી કિનારા પર આવેલા ગામોની સ્થિતિ કફોડી બની છે હાલમાં નદીનું પાણી કાળુ ડામર જેવું ભાસી રહ્યું છે. અસહ્ય દુર્ગંધથી આજુબાજુના ગામના લોકો પણ ત્રાસી ગયા છે. માખી-મચ્છરના ઉપદ્રવથી ખેતરોમાં રાત્રિ રોકાણ પણ ખેડૂતો કરી શકતા નથી.

  સાબરમતી નદીપટના કમોડ, પાલડી-કાંકજ, મીરોલી, નવાપુરા, સરોડા, ચંદીસર, આંબલીયારા, રસીકપુરા, ઇંગોલી, જુના વણઝર, બાકરોલ, વિસલપુર, નાના-મોટા છાપરા, ભાત, કાસીન્દ્રા સહિતના નદી કિનારાની આજુબાજુમાં વસેલા ગામો સાબરમતી નદીના દુષિત પાણીને લઇને પારાવાર હાલાકીઓ ભોગવી રહ્યા છે

  હાલમાં સરોડા પાસે નદીમાં ખૂબ જ ગંદુ અને દુર્ગંધયુક્ત પાણી વહી રહ્યું છે. આ અંગે ગ્રામજનોના જણાવ્યા મુજબ પશુઓ પાણી પી શકતા નથી. ખેતીમાં વપરાશ કરાય તો જમીનની ફળદ્રુપતા ઘટી જાય છે. આ વિસ્તારમાં પાકતી શાકભાજીનો ઉપાડ થતો નથી.