Gujarati News

સુરત : સુરતના પાંડેસરા વિસ્તારમાં દારૂના નશામાં યુવાને માત્ર અઢી વર્ષની બાળકી સાથે દુષ્કર્મ કરી હત્યા કર્યાની ઘટના હજુ તાજી છે ત્યારે વરાછાના બરોડા પ્રિસ્ટેજ વિસ્તારમાં સોમવારે રાત્રે દારૂના નશામાં ધૂત યુવાને 12 વર્ષીય બાળકીને ચોકલેટની લાલચ આપી શૌચાલયમાં લઈ જઈ દુષ્કર્મ આચરી મોઢું દબાવ્યું હતું. જોકે, બાળકીની બૂમો સાંભળી દોડી આવેલા નજીકના દુકાનદારોએ નરાધમને ઝડપી લેતા બાળકીનો જીવ બચી ગયો હતો. લોકોએ 30 વર્ષીય યુવાનને પોલીસને હવાલે કરતા પોલીસે તેની ધરપકડ કરી હતી.

પોલીસ સૂત્રો દ્વારા પ્રાપ્ત થતી વિગતો મુજબ મૂળ સૌરાષ્ટ્રના વતની અને સુરતના વરાછા વિસ્તારમાં રહેતી તેમજ કચરો વીણતી મહિલા ગતરાત્રે બરોડા પ્રિસ્ટેજ વિસ્તારમાં તેની ધો.7 માં અભ્યાસ કરતી 12 વર્ષીય પુત્રી સાથે કચરો વીણવા ગઈ હતી. કચરાના બે કોથળા થતા મહિલા એક કોથળો મુકવા ગઈ ત્યારે બાળકીને શૌચાલય પાસે એક કોથળા પાસે ઉભી રાખીને ગઈ હતી. તે સમયે નજીકના મકાનમાં સફાઈ કામ કરતા એક યુવાને તેને ચોકલેટ બતાવી પોતાની પાસે બોલાવી હતી. બાળકી તેની પાસે જતા યુવાન તેનો હાથ ખેંચી શૌચાલયમાં લઈ ગયો હતો અને દુષ્કર્મ આચરતા બાળકીએ બુમાબુમ કરી હતી. આથી યુવાને તેનું મોઢું દબાવી દીધું હતું. બાળકીની બૂમો સાંભળી નજીકના દુકાનદારો શૌચાલયમાં દોડી ગયા હતા અને યુવાનને રંગેહાથ ઝડપી પાડી બાળકીને બચાવી લીધી હતી. લોકોએ યુવાનને પકડયો ત્યારે તે દારૂના નશામાં ધૂત હતો.