Gujarati News

અમદાવાદ, તા.૯ : કોરોના કાળમાં પણ અમદાવાદ શહેરમાં વાહન ચોરો બેફામ બની રહ્યા છે. આડે દિવસે ચોરીના કિસ્સાઓ સામે આવી રહ્યા છે. ત્યારે હવે પોલીસ પણ તેમાંથી બાકાત નથી રહી. શહેરના એલિસબ્રિજ પોલીસ સ્ટેશનમાં નોકરી કરતા કોન્સ્ટેબલનું જ બાઈક જ ચોરો ઉઠાવી ગયા હતા. જોકે ચોંકાવનારી વાત એ છે કે પોલીસનું બાઈક ચોરાયું હોવા છતાં ફરિયાદ ૧૦ દિવસ બાદ નોંધાવવામાં આવી હતી. રિપોર્ટ મુજબ, ધોળકામાં રહેતા અને એલિસબ્રિજ પોલીસ સ્ટેશનમાં ફરજ બજાવતા કોન્સ્ટેલબ મનહર પરવારનું બાઈક ૨૮ જુલાઈએ રાત્રે ૮ વાગ્યે એલિસબ્રિજ નીચે પાર્ક કરાયું હતું.

               જ્યારે બીજા દિવસે સવારે બાઈક ત્યાંથી ગુમ થઈ ગયું હોવાની જાણ થઈ હતી. આ મામલે પોલીસ તરફથી શરૂઆતમાં ઘણી શોધખોળ કરવામાં આવી, જોકે તેમ છતાં બાઈકની કોઈ ભાળ ન મળતા શનિવારે એલિસબ્રિજ પોલીસ સ્ટેશનમાં ચોરીની ફરિયાદ નોંધાવવામાં આવી હતી. એવામાં અહીં સવાલ ઊભો થઈ રહ્યો છે કે જો પોલીસ સ્ટેશનની સામેથી જ પોલીસનું વાહન ચોરાઈ જતું હોય તો સામાન્ય લોકો ક્યાં જાય. ઉલ્લેખનીય છે કે શહેરના સેટેલાઈટ, આંબાવાડી તથા સરખેજ સહિતના વિસ્તારોમાં વાહન ચોરીના ઘણા બનાવો બનતા હોય છે. આ વિસ્તારોમાં ચાકુની અણીએ કારતથા એક્ટિવાની ચોરી થઈ ચૂકી છે જેના આરોપીઓ હજુ ફરાર છે.