Gujarati News

વડોદરા: શહેરના તરસાલી વિસ્તારમાં શુક્રવારે કુંજલ પંચાલ નામની પરિણિત યુવતીની થયેલી ઘાતકી હત્યાનો પોલીસે ભેદ ઉકેલી કાઢ્યો છે. પોલીસના જણાવ્યા અનુસાર, કુંજલની હત્યા બીજા કોઈએ નહીં, પરંતુ તેના પ્રેમી મિત પંચાલે જ કરી હતી. કુંજલને મોતને ઘાટ ઉતાર્યા બાદ મિત પંચાલે પણ ટ્રેન નીચે પડતું મૂકી શુક્રવારે બપોરે જ આપઘાત કરી લીધો હતો. પોલીસને તેની લખેલી સ્યૂઈસાઈડ નોટ પણ મળી આવી છે.

તરસાલીની આનંદબાગ સોસાયટીમાં રહેતી કુંજલ પંચાલની ગઈકાલે બપોરે 12 વાગ્યાના અરસામાં ગળું કાપીને હત્યા કરવામાં આવી હતી. પોલીસના કહેવા અનુસાર, શાક સમારવાના ચાકૂથી કુંજલનું ગળું કાપવામાં આવ્યું હતું. પોલીસે જણાવ્યું હતું કે, મિત અને કુંજલ વચ્ચે પ્રેમસંબંધ હતાં. જોકે, કુંજલ પરિણિત હોવાથી સમાજ પોતાના સંબંધ ક્યારેય નહીં સ્વીકારે તેવો બંનેને ડર હતો.

મિત અને કુંજલે ભાગી જવાનો પ્લાન પણ બનાવ્યો હતો. પરંતુ, બદનામીના ડરથી કુંજલે ભાગી જવાનો ઈનકાર કરી દીધો હતો. પોલીસના દાવા અનુસાર, સમાજ ક્યારેય ભેગા નહીં થવા દે તે ડરથી કુંજલે જ મિતને કહ્યું હતું કે, તું મારી હત્યા કરી નાખ, અને પછી તું પણ આપઘાત કરી લે. આ પ્લાન બનાવ્યા બાદ જ મિતે કુંજલની હત્યા કરી હતી.

આ પ્લાન હેઠળ શુક્રવારે સવારે 10 થી 11 વાગ્યાના અરસામાં મિત પંચાલ કુંજલના ઘરે પહોંચ્યો હતો, અને તે એક કલાક રોકાયો હતો. ત્યાં તેણે કુંજલની હત્યા કરી હતી. પોલીસે કહ્યું હતું કે, ઘટનાસ્થળે તપાસ અને આસપાસના લોકોની પૂછપરછ કરતા સફેદ એક્ટિવા લઈ કોઈ યુવક કુંજલના ઘરે આવ્યો હતો તેવી પોલીસને માહિતી મળી હતી.

પોલીસે કુંજલની કોલ ડિટેઈલ્સ પણ ચેક કરી હતી, જેમાં કુંજલ અને મિત વચ્ચે ખૂબ જ ફોન કોલ્સ થયા હોવાનું બહાર આવ્યું હતું. મિત પાસેથી મળેલી સ્યૂઈસાઈડ નોટ અંગે પોલીસે જણાવ્યું હતું કે, તેમાં મિતે કબૂલ્યું છે કે તેના કુંજલ સાથે પ્રેમસંબંધ હતાં અને બંનેએ આ દુનિયા છોડી દેવાનો નિર્ણય કર્યો હતો.

સ્યૂઈસાઈડ નોટમાં મિત અને કુંજલની સહી પણ છે. બંનેએ સાથે મળી સ્યૂઈસાઈડ નોટ લખી હોવાની પણ શંકા છે. પોલીસે સ્યૂઈસાઈડ નોટને એફએસએલમાં મોકલી તેની સત્યતાની ખરાઈ કરવાની પણ પ્રક્રિયા શરુ કરી છે. ગઈકાલે કુંજલ સ્કૂલે પોતાના દીકરાને લેવા ન જતા સ્કૂલે તેમના સંબંધીને ફોન કર્યો હતો, અને આ સંબંધીએ ઘરે આવી તપાસ કરતા કુંજલની લાશ મળી આવ્યા બાદ સમગ્ર ઘટના પ્રકાશમાં આવી હતી.