Gujarati News

અમદાવાદ: પેટ્રોલના ભાવ દિવસેને દિવસે વધી રહ્યા છે. જોકે, તેનાથી સરકારના પેટનું પાણી પણ નથી હાલતું. ત્યારે અમદાવાદીઓમાં એક જ વાતની ચર્ચા છે, કે પેટ્રોલ આ મહિનામાં જ 80 રુપિયાની સપાટી વટાવશે કે કેમ? શહેરમાં છેલ્લા એક મહિનાથી પેટ્રોલ અને ડીઝલના ભાવ સતત વધી રહ્યા છે, અને રોજ પાંચ-દસ પૈસાનો આ વધારો આજે રુ. 78.56 પર આવીને ઉભો રહ્યો છે.

અમદાવાદમાં ભલે પેટ્રોલનો ભાવ હાલ 80 રુપિયાની નજીક હોય, પરંતુ દેશના અન્ય મહાનગરો જેવા કે મુંબઈ, ચેન્નૈ, કોલકાતા તેમજ બેંગલુરુમાં પેટ્રોલ 80 રુપિયાને પાર ક્યારનુંય થઈ ગયું છે. મુંબઈમાં તો પેટ્રોલનો ભાવ 85 રુપિયાથી પણ વધુ ચાલી રહ્યો છે.

પેટ્રોલ જ નહીં, ડીઝલમાં પણ બરાબરની આગ લાગી છે. અમદાવાદમાં ડીઝલનો આજનો ભાવ 76.61 રુપિયા પ્રતિ લિટર છે. મતલબ કે, પેટ્રોલ અને ડીઝલ વચ્ચે બે રુપિયાથી પણ ઓછો તફાવત રહી ગયો છે. હજુ તો ઓગસ્ટની શરુઆતમાં જેટલો પેટ્રોલનો ભાવ હતો, તેના કરતા પણ આજે ડીઝલ મોંઘું વેચાઈ રહ્યું છે. ડીઝલના ભાવ વધવાથી ટ્રાન્સપોર્ટેશન પણ વધતા મોંઘવારી પણ વકરી છે.

પેટ્રોલ-ડીઝલના ભાવ આસમાને પહોંચતા સોશિયલ મીડિયામાં પણ આ મુદ્દો છવાયો છે. લોકો 2014ના એ દિવસો યાદ કરી રહ્યા છે, જ્યારે ચૂંટણી પ્રચારના સમયમાં ‘બહુત હુઈ મહંગે પેટ્રોલ-ડીઝલ કી માર, અબકી બાર…’વાળા સૂત્રોને યાદ અપાવી હાલના ભાવોને જોઈને બળાપો કાઢી રહ્યાં છે. 2014ની લોકસભા ચૂંટણી પ્રચાર વખતના વીડિયો પણ સોશિયલ મીડિયામાં વાયરલ થઈ રહ્યા છે.

પેટ્રોલના રોજેરોજ વધતા ભાવથી જનતા પરેશાન છે, પરંતુ સરકારે તેના માટે આંતરરાષ્ટ્રીય કારણોને જવાબદાર ઠેરવીને હાથ અદ્ધર કરી દીધા છે. ક્રુડના ભાવ ઓછા હતા ત્યારે પેટ્રોલ-ડીઝલ પરની એક્સાઈઝ ડ્યૂટી વધારી તગડી કમાણી કરી લેનારી સરકાર જ્યારે હવે ક્રુડના ભાવ થોડા વધ્યા છે ત્યારે પ્રજાને રાહત આપવા તૈયાર નથી.