Gujarati News

તાપી, તા.૫ : તાપી જિલ્લાના સોનગઢ તાલુકાના ડોસવાડા ગામે ઝીંક કંપનીના વિરોધમાં હિંસક પ્રદર્શનની ઘટના સામે આવી છે. પ્રાપ્ત માહિતી પ્રમાણે કેમિકલ ફેક્ટરી સ્થાપવા મામલે સ્થાનિકો વિરોધ કરી રહ્યા હતા. આ દરમિયાન પોલીસ અને લોકો વચ્ચે ઘર્ષણ થયું હતું, જેમાં લોકોએ પોલીસ પર જોરદાર પથ્થરમારો કર્યો હતો અને ગાડીઓમાં તોડફોડ કરી હતી. ત્યારે જવાબી કાર્યવાહીમાં પોલીસે પણ લાઠીચાર્જ કર્યો હતો અને ટોળાને વિખેરવા માટે ટીયર ગેસના સેલ છોડ્યા હતા. પ્રાપ્ત માહિતી પ્રમાણે સોમવારે ઝીંક કંપની મામલે ડોસાવાડા ગામે ગુજરાત પોલ્યુશન કંટ્રોલ બોર્ડ (જીપીસીબી) દ્વારા લોક સુનાવણીનું આયોજન કરવામાં આવ્યું હતું. આ વિસ્તારમાં આ કંપની દ્વારા ઝીંક કંપનીનો પ્લાન્ટ સ્થાપવામાં આવનાર છે. જોકે, આદિવાસી સમાજ દ્વારા પ્રદૂષણ તેમજ જમીનના હક્કોના મામલે આજે ઉગ્ર વિરોધ કરવામાં આવ્યો હતો. આ દરમિયાન પોલીસ અને સ્થાનિકો વચ્ચે ઘર્ષણ થયું હતું.

ઘર્ષણ દરમિયાન સેંકડોના ટોળાઓ પોલીસની ટીમ પર હુમલો કર્યો હતો. જેથી બેકાબૂ બનેલા ટોળાને વિખેરવા માટે પોલીસે લાઠીચાર્જ કર્યો હતો. જો કે, લોકોમાં એટલો વધારે આક્રોશ હતો કે, પોલીસની ગાડીઓ પર જોરદાર પથ્થરમારો કરીને તોડફોડ કરી હતી અને ગાડીઓ ઉંધી વાળી દીધી હતી. જેથી પોલીસે ટીયર ગેસના સેલ છોડ્યા હતા. આમ રસ્તા પર સેંકડોની સંખ્યામાં ટોળાએ હિંસક પ્રદર્શન કર્યું હતું. બેકાબૂ બનેલા ટોળાએ પથ્થરમારો કરતા કેટલાક પોલીસકર્મીઓ પણ ઘાયલ થયા હોવાનું જાણવા મળ્યું છે. આ હિંસક ઘટનાની અનેક તસવીરો પણ સામે આવી રહી છે. જેમાં એક પોલીસકર્મીને માથામાં ઈજા થતાં લોહીલુહાણ થયા હતા. ઉપરાંત એક ડીવાયએસપીને પગમાં ઈજા થઈ હોવાનું સામે આવ્યું છે. ઘર્ષણ દરમિયાન અનેક ગાડીઓમાં તોડફોડ કરતા કેટલાક કર્મચારીઓ ઈજાગ્રસ્ત થયા છે.

અહેવાલો મુજબ સ્થાનિકોએ માંગ કરી હતી કે, જીપીસીબીની લોક સુનાવણી મોકૂફ રાખવામાં આવે અને આ વિસ્તારમાં પર્યાવરણને ન પહોંચે તે માટે પ્લાન્ટ અહિંયા સ્થાપવામાં ન આવે. જોકે, મામલો થાળે ન પડતા ઘર્ષણ થયું હતું.