Gujarati News

અમદાવાદ : દર વર્ષે વૈશાખ સુદ-પૂનમના દિવસે પરંપરાગત માતાજીની નગરયાત્રા નીકળે છે. આ નગરયાત્રામાં દેવ-દેવીઓના અલગ-અલગ ટેબલો આકર્ષણનું કેન્દ્ર હોય છે. પણ આ વર્ષે કોરોનાની મહામારીને કારણે મા ઉમિયાની નગરયાત્રા મોકૂફ રાખવાનો નિર્ણય કર્યો છે  વૈશ્વિક મહામારી કોરોનાના કારણે ઊંઝા સંસ્થાએ આ મહત્વપુર્ણ નિર્ણય નિર્ણય કર્યો હતો.

આ વર્ષે 7-5-2020નાં રોજ મા ઉમિયાની નગરયાત્રા નીકળવાની હતી. પણ મા ઉમિયાની નગરયાત્રાને કોરોનાનું ગ્રહણ લાગી ગયું છે. દર વર્ષે મા ઉમિયાની નગરયાત્રામાં ભાગ લેવા માટે દેશ-વિદેશથી શ્રદ્ધાળુઓ ઉમટી પડે છે. તો આ નગરયાત્રામાં હજારોની સંખ્યામાં લોકો ભાગ લે છે. તેવામાં આ વર્ષે યોજાનારી નગરયાત્રા મોકૂફ રહેતાં શ્રદ્ધાળુઓમાં નિરાશા ફેલાઈ ગઈ હતી.

મા ઉમિયાની નગરયાત્રાને લઇ ગંજબજાર સહિતના તમામ બજારો બંધ રહે છે. રથનું ગંજબજાર સહિત ઠેર-ઠેર સ્વાગત કરાતું હોય છે. તમામ મહોલ્લા, પરા, ચોક,વિસ્તાર, ધાર્મિક મંદિરો, સંસ્થાઓ દ્વારા રથનું પૂજન કરવામાં આવે છે. ઊંઝા સહિત દેશ-વિદેશમાં વસતા મા ઉમાના ભક્તો તેમજ વંશજો ઊંઝા પધારી નગરયાત્રામાં જોડાય છે. મૈયાનું મંદિર રાત્રે ડિજીટલ લાઈટથી દિવાળીની જેમ ઝગમગી ઉઠે છે.