Gujarati News

મુંબઇ:  રોહિત શેટ્ટીએ તેની આગામી ફિલ્મમાં રણવીર સિંહને મુખ્ય પાત્રમાં લીધો છે. હવે દિગ્દર્શક પોતાના લકી અભિનેતા અજયને પણ આ ફિલ્મમાં લેવા માંગે છે. પરંતુ આ ફિલ્મ કરણ જોહરની હોવાથી અજય રાજી થશે કે નહીં તે બાબતે શંકા છે. રોહિત શેટ્ટીની આ ફિલ્મમાં રણવીર સિંહ એક લાંચિયા પોલીસ અધિકારીની ભૂમિકા ભજવે છે. હવે રોહિત ઇચ્છે છે કે આ પોલીસ અફસરને સુધારવાનું પાત્ર તેનો સહકર્મી અજય બને. જોકે  આ રોલ બહુ મોટો નહીં હોય. પરંતુ રોહિત અને તેની ટીમને અજય આ ફિલ્મ સાથે જોડાય તેવી બહુ ઇચ્છા છે. અજયને કાજોલ અથવા તો રોહિત પોતે જ વિશ્વાસમાં લઇને મનાવી શકે એમ છે. સહુ કોઇ જાણે છે કે, કાજોલ અને કરણ જોહરના સંબંધો વણસ્યા હતા.જોકે બન્નેએ પેચઅપ કરી લીધું હોવાની વાત છે. હવે અજય આ ફિલ્મમાં કામ કરવા રાજી થાય છે કે નહીં તે જોવાનું રહ્યું.