Gujarati News

અમદાવાદ, તા. ૬ : આલિયા ભટ્ટ અને રણબીર કપૂરની જોડી આજકાલ પોતાની ફિલ્મોથી વધારે અફેરને લઈને ચર્ચામાં રહે છે. પાછલા લાંબા સમયથી આલિયા-રણબીર કમિટેડ રિલેશનશીપમાં હોવાનું માનવામાં આવી રહ્યું છે. કોરોના વાયરસના કારણે થયેલા લોકડાઉન દરમિયાન પણ બંને એકસાથે રહી રહ્યા હતા. હવે ખબર આવી રહી છે કે આલિયાએ તે જ બિલ્ડીંગમાં એક એપાર્ટમેન્ટ ખરીદી લીધું છે જેમાં રણબીર કપૂર રહી રહ્યો છે.

મીડિયા રિપોર્ટ્સનું માનીએ તો આલિયાનું આ એપાર્ટમેન્ટ ૩૨ કરોડ રૂપિયાનું છે. આલિયાનું આ એપાર્ટમેન્ટ ૨૪૬૦ સ્ક્વેર ફૂટનું છે અને પાંચમા માળ પર છે. રણબીરનું એપાર્ટમેન્ટ પણ આ જ બિલ્ડીંગમાં ૭માં માળ પર છે. કુલ ૧૨ માળની આ બિલ્ડીંગ કપૂર પરિવારના કૃષ્ણા રાજ બંગલાની નજીકમાં જ છે. જોકે હજુ આલિયા પોતાની બહેન શાહીન ભટ્ટ સાથે જૂહુમાં રહી રહી છે અને માનવામાં આવી રહ્યું છે કે જલ્દી જ તે પોતાના નવા એપાર્ટમેન્ટમાં શિફ્ટ થઈ શકે છે.

આલિયાના એક નિકટના સૂત્રએ પિંકવિલાને જણાવ્યું કે, આલિયાએ પોતાના નવા એપાર્ટમેન્ટના ઈન્ટીરિયરની ડિઝાઈનિંગ માટે શાહરૂખ ખાનની પત્ની ગૌરી ખાનને કહ્યું છે, જણે પોતાનો બંગલો પણ સુંદર રીતે સજાવ્યો છે. એવું પણ જાણવા મળ્યું છે કે આલિયાએ પોતાના નવા ઘરમાં હવન અને લક્ષ્મી પૂજા કરાવી હતી, જેમાં પરિવારના લોકો ઉપરાંત રણબીર કપૂર, કરણ જોહર અને અયાન મુખર્જી પણ સામેલ થયો હતો. આ ઘર ઉપરાંત આલિયાએ આ પહેલા જૂહુમાં પણ ૧૩.૧૧ કરોડ રૂપિયાનું એપાર્ટમેન્ટ ખરીદ્યું હતું.

ઉલ્લેખનીય છે કે આલિયા અને રણબીર કપૂર હાલમાં અયાન મુખર્જીની ફિલ્મ 'બ્રહ્માસ્ત્ર'માં સાથે કામ કરી રહ્યા છે. આ મલ્ટી સ્ટારર ફિલ્મમાં અન્ય મોટા કલાકારો પણ તેમની સાથે જોવા મળશે.