Gujarati News

મુંબઈ, તા. ૨૮ : અક્ષય કુમાર સાથે બોલિવૂડ સાથે ડેબ્યૂ કરનારી એક્ટ્રેસ શાંતિપ્રિયા છેલ્લા ઘણા સમયથી લાઈમલાઈટથી દૂર હતી. તાજેતરમાં જાણકારી સામે આવી છે કે, તે 'બિગ બૉસ ૧૪'માં જોવા મળશે. ત્યારબાદથી શાંતિપ્રિયા ફરી એકવાર ચર્ચામાં છે. શાંતિપ્રિયાએ દિવંગત્ અંગે ઘણી વાતો જણાવી છે. શાંતિપ્રિયાને અફસોસ છે કે તે દિવ્યાને ઘણી બધી વાતો પૂછી ન શકી.

શાંતિપ્રિયાએ જણાવ્યું કે, 'મારી અને દિવ્યાની મુલાકાત એક ટૂર દરમિયાન થઈ હતી. અમને બંનેને સરોજ મેમ ડાન્સ શીખવતા હતા અને અમારો સાથે સારો સમય પસાર થતો હતો. દિવ્યા ખૂબ જ બબલી અને ઈનોસેન્ટ નેચરની યુવતી હતી. તે બહુ નાની ઉંમરની હતી પણ ખુલીને વાત કરતી હતી. હું સાઉથ ઈન્ડિયાથી છું, આ કારણે અમારી વચ્ચે થોડો કૉમ્યુનિકેશન ગેપ જરૂર હતો. અમે એક સપ્તાહ માટે બહેરીન અને UAEની ટૂર પર ગયા હતા. આ દરમિયાન અમે ફેમિલી મેમ્બર્સ જેવા બની ગયા હતા. મેં દિવ્યા સાથે ક્યારેય કામ કર્યું નથી, માત્ર ટૂર પર સાથે રહ્યાં.'

શાંતિપ્રિયાએ આગળ જણાવ્યું કે, 'દિવ્યા થોડી ડિપ્રેશનમાં પણ રહેતી હતી. એકવાર ડાન્સ પ્રેક્ટિસ દરમિયા મેં તેના હાથ પર બ્લેડના ૧૨-૧૫ કટ માર્ક્સ જોયા હતા અને હું ચિંતામાં પડી ગઈ હતી કે, તેની સાથે શું થઈ રહ્યું છે. નિશાન નવા નહોતા, થોડા જૂના હતા.  તે કોઈ એક્સિડેન્ટના નહોતા લાગી રહ્યાં પણ સાફ દેખાઈ રહ્યું હતું કે, બ્લેડ વડે કાપવામાં આવ્યા હતા. આ જોઈને બહુ ખરાબ લાગતું હતું.

જોકે, જ્યારે પણ તે અમારી પાસે આવતી હતી ત્યારે ખૂબ હસીને વાતો કરતી હતી. હું વિચારતી હતી કે, તેની સાથે વાત કરવી જોઈએ કે, શું પ્રોબ્લેમ છે પણ મેં ક્યારેય ન પૂછ્યું. હવે જ્યારે હું દિવ્યા વિશે વિચારું છું ત્યારે મને એ વાતનો અફસોસ થાય છે.'

શાંતિપ્રિયા કહે છે કે, 'અમારા જમાનામાં સેટના સંબંધ સેટ પર રહેતા હતા. ત્યારે આટલું હળવા-મળવાનું થતું નહોતું. કદાચ આ જ કારણ હતું કે, તેની સાથે ખુલીની વાત ન કરી શકી. એ વાતનો પણ ડર હતો કે, જો હું તેને કંઈક પૂછત અને મને કહી દેત કે, તારા આનાથી શું લેવા-દેવા, ત્યારે ખોટું લાગત. કદાચ મેં એટલે તેને ના પૂછ્યું.'

શાંતિપ્રિયાએ જણાવ્યું કે, 'તે સમયે દિવ્યા ૧૯ વર્ષની બાળકી હતી. ત્યારે અમે એકબીજાની જિંદગીમાં બહુ ડોકિયા કરતા નહોતા. તે ઘણીવાર એકલી બેસી રહેતી હતી અને ચૂપ રહેતી હતી, જાણે ડિપ્રેશનમાં હોય.  એક કો-આર્ટિસ્ટ હોવાને નાતે એવું લાગે છે કે, મારી ભૂલ હતી. એક છોકરી હોવાના નાતે મારે તેને પૂછવું જોઈતું હતું. ત્યારે મીડિયા પણ ખૂબ ચર્ચા હતી કે, તેના લગ્ન થવાના છે કે નહીં. કદાચ આ જ કારણો રહ્યાં હશે. હવે તે આપણી વચ્ચે નથી. મને દુઃખ છે હું ત્યારે તેની સાથે તેના પ્રોબ્લેમ્સ પર વાત ન કરી શકી.'