Gujarati News

નવી દિલ્હી, તા. ૨૭ : ટીવીથી લઈને બોલિવૂડ સુધીની સફર કરનારા અભિનેતા સુશાંત સિંહ રાજપૂત હવે આપણી વચ્ચે નથી. તેમના મૃત્યુના બે અઠવાડિયા પછી, સુશાંતના પિતા કે.કે.સિંઘે પ્રથમ વખત મીડિયા સાથે તેમના પુત્ર વિશે વાત કરી છે. સુશાંત સિંહના પિતાએ પણ સોશિયલ મીડિયા પર તેમના પુત્રના અંગત જીવનને લગતા પ્રશ્નોના જવાબ આપ્યા છે. કે.કે.સિંઘે સુશાંત સિંહ અને અભિનેત્રી અંકિતા લોખંડે વચ્ચેના સંબંધો અંગે મૌન પણ તોડ્યું છે. તેમણે જણાવ્યું કે તે અંકિતાને મુંબઈમાં મળ્યો હતો અને તે પણ એક વખત પટણામાં મળવા આવી હતી. બોલિવૂડના ઉભરતા સ્ટાર સુશાંત સિંહ રાજપૂત હવે આપણી વચ્ચે નથી, તેમના ચાહકો અને નજીકના મિત્રોને હજી પણ આ વાત માનવામાં મુશ્કેલી થઈ રહી છે.

             અંકિતા લોખંડે સુશાંતના મૃત્યુ પછી પણ ગમગીન છે. સુશાંતના ગયા પછી પહેલી વાર તેના પિતા કે.કે.સિંઘે તેમના પુત્ર અને તેની પૂર્વ ગર્લફ્રેન્ડ અંકિતા વચ્ચેના સંબંધો પર વાત કરી હતી. તેમણે કહ્યું કે અંકિતા સુશાંતના જીવનની એકમાત્ર એવી છોકરી છે, જેના વિશે તેઓ જાણતા હતા. કે.કે.સિંઘ કહ્યું કે તે સુશાંતની પૂર્વ ગર્લફ્રેન્ડ અંકિતા લોખંડે સાથે તેમની મુલાકાત મુંબઈમાં થઈ હતી, તે પહેલાં પણ તે પટનાના ઘરે આવી ચૂકી હતી. સુશાંત અને અંકિતાના અલગ થવા અંગે તેમણે કહ્યું, 'હવે તે સંજોગ છે, જે થવાનું છે તે થઈ ગયું છે.' સુશાંતના લગ્નના સવાલ પર તેમણે જવાબ આપ્યો, તાજેતરમાં મેં મારા પુત્રને જલ્દી લગ્ન કરવાનું કહ્યું હતું. સુશાંતે જવાબ આપ્યો કે હજી કોરોના છે અને તેણે એક ફિલ્મનું શૂટિંગ પૂર્ણ કરવાનું છે, અને તે પછી તે લગ્નની યોજના કરશે. નવેમ્બરમાં સુશાંતના લગ્ન અંગે પ્રશ્ન પૂછવામાં આવતા  તેના પિતાએ કહ્યું હતું કે, મેં તેને આ વિશે કંઈ પૂછ્યું નહીં, હું ઇચ્છતો હતો કે મારો પુત્ર સેટલ થાય.

          મેં તેને પહેલેથી જ કહ્યું હતું કે તે જેની સાથે લગ્ન કરવા માંગે છે તે લગ્ન કરી શકે છે. અત્રે ઉલ્લેખનીય છે કે અંકિતા લોખંડે અને સુશાંત સિંહ રાજપૂત પવિત્ર રિશ્તાના સેટ પર મળ્યા હતા અને બંને ઘણા લાંબા સમયથી સાથે હતા. અંકિતા સુશાંતના મૃત્યુ પછી મુંબઇમાં પણ તેના પરિવારને મળી હતી.

            સુશાંતના પિતા કે.કે.સિંઘે જણાવ્યું હતું કે પુત્રની અંતિમ વિધિમાં ભાગ લેવા શ્રદ્ધા કપૂર, વરૂણ શર્મા, રણવીર શૌરી, રાજકુમાર રાવ અને અન્ય ઘણા લોકો પહોંચ્યા હતા. આ સમય દરમિયાન, તેની સાથે અભિનેત્રી કૃતિ સેનન પણ હતી, જોકે તેણે માસ્ક પહેર્યું હોઈ અને પુત્ર ગુમાવ્યાના ગમમાં હોવાને લીધે કૃતીને ઓળખી શક્યા નહતા. કે.કે.સિંહે જણાવ્યું કે અંતિમ સંસ્કાર દરમિયાન કૃતી સેનન તેમની પાસે આવી અને સુશાંત વિશે વાત કરી. કૃતિએ સુશાંતની પ્રશંસા કરી રહી હતી, કહ્યું હતું કે તે ખુબજ પ્રેમાળ છોકરો હતો.  અત્રે ઉલ્લેખનીય છે કે, સુશાંત સિંહ રાજપૂતે ૧૪ જૂનના રોજ સવારે મુંબઇના બાંદ્રા સ્થિત તેના ઘરે આત્મહત્યા કરી હતી. સુશાંતના આ પગલાનું કોઈ નક્કર કારણ મળ્યું નથી, પરંતુ પોલીસના જણાવ્યા મુજબ તે ડિપ્રેશનથી પીડાઈ રહ્યો હતો અને કોઈ વસ્તુની ચિંતામાં હતો.

            સુશાંતને જેની ચિંતા હતી તે વિશે ઘણી બાબતો ચાલી રહી છે, જેમાંથી એક ભાઈ ભત્રીજાવાદ છે. સુશાંતના મોતને લઈને બોલિવૂડ પણ બે જૂથોમાં વિભાજીત થઈ ગયું છે, ઘણા મોટા સ્ટાર્સે નેપોટિઝમ અંગે સોશિયલ મીડિયા પર પોતાના મંતવ્યો મૂક્યા છે.  પોસ્ટમોર્ટમના અંતિમ અહેવાલમાં આત્મહત્યાની પુષ્ટિ મળી હતી. ૫ ડોકટરોની ટીમે પોસ્ટમોર્ટમ રિપોર્ટનું વિશ્લેષણ કરી અંતિમ અહેવાલ તૈયાર કર્યો હતો. જોકે, વિસેરા રિપોર્ટ હજી આવ્યો નથી. પોલીસ તેની રાહ જોઇ રહી છે. સુશાંત સિંહ રાજપૂતના આપઘાત કેસમાંના અંતિમ અહેવાલ પરથી, મુંબઈ પોલીસને જાણવા મળ્યું છે કે સુશાંતનું મોત ફાંસી લગાવવા કારણે થયું હતું. રિપોર્ટમાં જણાવાયું છે કે સુશાંતનું મોત ગૂંગળામણના કારણે થયું હતું. સુશાંતસિંહ રાજપૂતના શરીર પર કોઈ ઉઝરડા અથવા બાહ્ય ઉઝરડા મળ્યા નથી. તેના નખ સાફ હતા. પોસ્ટમોર્ટમ રિપોર્ટમાં જણાવાયું છે કે આ આપઘાતનો સ્પષ્ટ કેસ છે. આ સિવાય મોતનું બીજું કોઈ કારણ નથી.