Gujarati News

મુંબઇ તા. ૧૯: એમેઝોન ઓરિજિનલની ફિલ્મ 'અનપોઝડ-નયા સફર'નું ટ્રેલર લોન્ચ થયા પછી તેનું એક ગીત આજે રજુ કરાયું છે. સંગીતકાર બેલડી સચિન-જીગર દ્વારા રચિત આ ગીત ફિલ્મની થીમની જેમ જ આશા અને સકારાત્મકતાનો સંદેશો રજૂ કરે છે. અમિત મિશ્રાએ તેને ગાયું છે. જેમાં શેકસસ્પિયરનું રેપ પણ છે. નયા સફરના ગીતો કૌશર મુનીરે લખ્યા છે.
આ ગીત વિશે વાત કરતાં, સંગીતકાર જોડી સચિન સંઘવી અને જીગર સરૈયાએ જણાવ્યું હતું કે, નયા સફર ગીત કૃતજ્ઞતા અને નવી શરૂઆતના વિષયની આસપાસ છે. આપણા જીવનમાં એવો સમય આવે છે કે જ્યારે આપણે અનુભવીએ છીએ કે આપણે બધું જ ગુમાવી દીધું છે, ક્યાંય જવા જેવું હોતું નથી, વગેરે. નયા સફર એક એવું ગીત છે જે પ્રેરણાનું કાર્ય કરે છે અને શ્રોતાઓના હૃદયને પુનઃશકિતસંચારયુકત આશા અને સકારાત્મકતાથી ભરી દે છે  જેથી તેઓ કોઈપણ વસ્તુથી નિરાશ ન બને. અનપોઝડ-નયા સફર કોવિડ-૧૯ ના લીધે આપણી જિંદગી પર પડેલા તેના પ્રભાવ વિશે પાંચ અનોખી વાર્તાઓ થકી આશા, સકારાત્મકતા અને નવી શરૂઆતની ખિડકી ખોલે છે. જે આપણા માટે જીવન અને લાગણીઓને પહેલા કરતા વધુ મૂલ્યવાન બનાવે છે. પ્રેમ, ઝંખના, ડર અને મિત્રતા જેવી માનવીય લાગણીઓના ચિત્રણોને  સંવેદનશીલ રીતે જીવંત કરવામાં આવ્યા છે. ભારત તથા બીજા ૨૪૦ દેશામાં અનપોઝડ- નયા સફર ૨૧મીએ રિલીઝ થશે.