Gujarati News

મુંબઈ : બિગ બૉસ સિઝન ૧૪ ફેમ સિંગર રાહુલ વૈદ્યએ તારીખ ૧૬ જુલાઈ એટલે કે શુક્રવારે તેની ગર્લફ્રેન્ડ દિશા પરમાર સાથે લગ્ન કર્યા છે. રાહુલ વૈદ્યના લગ્નમાં તેના મિત્રોએ ખૂબ મસ્તી કરી છે. જેમાં દોસ્ત અલી ગોનીએ રાહુલ વૈદ્યના જૂતા ચોરી થતાં બચાવી લીધા છે. રાહુલ વૈદ્યના લગ્નના તમામ વિડીયો અને ફોટોગ્રાફ્સ સોશિયલ મીડિયા પર વાયરલ થઈ રહ્યા છે. એક વિડીયોમાં રાહુલ વૈદ્યનો ખાસ દોસ્ત અલી ગોની એવું કહેતો સાંભળવા મળે છે કે 'જૂતા ચોરી થવા નહીં દઈએ'. પણ, તેમાં અલી ગોનીનો ચહેરો જોવા મળી રહ્યો નથી. અલી ગોનીએ તેના સોશિયલ મીડિયા ઈન્સ્ટાગ્રામ અકાઉન્ટ પર રાહુલ વૈદ્ય સાથેનો એક ફોટોગ્રાફ શેર કર્યો છે. જેમાં તેઓ બંને મસ્તીના મૂડમાં જોવા મળી રહ્યા છે. આ ફોટોગ્રાફ શેર કરતા તેણે લખ્યું કે 'આજ મેરે યાર કી શાદી હે'. અલી ગોનીએ તેના બેસ્ટ ફ્રેન્ડ રાહુલ વૈદ્યના લગ્નમાં જાનૈયા તરીકે ખૂબ મસ્તી કરી છે. રાહુલ અને દિશાના લગ્ન મુંબઈના ગ્રાન્ડ હયાતમાં ધામધૂમથી થયા હતા. બંનેએ પરિવારજનો તેમજ મિત્રોની હાજરીમાં સાત ફેરા ફરીને આજીવન એકબીજાને સાથ આપવાનું વચન આપ્યું છે. જીવનના ખાસ દિવસે રાહુલે જ્યાં ગોલ્ડન કલરના એમ્બ્રોઈડરી કલરની શેરવાની પહેરી હતી તો દિશાએ લાલ કલરનો લહેંગો પહેર્યો હતો. લગ્નના આ આઉટફિટમાં બંનેની જોડી જામી રહી છે. રાહુલ વૈદ્ય વરઘોડો લઈને પહોંચ્યો ત્યારે મિત્રો સાથે ખૂબ નાચ્યો હતો. તેનો વીડિયો પણ સામે આવ્યો છે. જેમાં તે અન્ય મિત્રો સાથે ઢોલના તાલે નાચતા જોવા મળી રહ્યા છે. દિશા પરમારની એન્ટ્રી પણ ખૂબ શાનદાર રીતે કરવામાં આવી હતી. તેની એન્ટ્રી થતાં જ બોલિવુડ સોન્ગ દિન શગન દા વગાડવામાં આવ્યું હતું. રાહુલ અને દિશાની મુલાકાત વર્ષ ૨૦૧૮માં મ્યૂઝિક વીડિયોના શૂટિંગ દરમિયાન થઈ હતી. 'બિગ બોસ'ના ઘરમાં એન્ટ્રી કરતાં પહેલા રાહુલ વૈદ્ય અને દિશા પરમાર સારા મિત્રો હતા પરંતુ બાદમાં બંનેને એકબીજા પ્રત્યેના પ્રેમનો અહેસાસ થયો હતો. રાહુલે નેશનલ ટેલિવિઝન પર દિશાને પ્રપોઝ કર્યું હતું.