Gujarati News

મુંબઈ : ૯૦ના દશકામાં બોલિવુડના રૂપેરી પડદા પર રાજ કરનારી એક્ટ્રેસ કરિશ્મા કપૂરે પોતાના કરિયર દરમિયાન અક્ષય કુમાર, સલમાન ખાન, સુનીલ શેટ્ટી તેમજ આમિર ખાન જેવા ટોપ એક્ટર્સ સાથે કામ કર્યું હતું. કરિશ્મા કપૂર સિંગિંગ રિયાલિટી શો ઈન્ડિયન આઈડલ ૧૨ના અપકમિંગ એપિસોડમાં મહેમાન બનવાની છે ત્યારે તે તેના કો-એક્ટર્સની પોલ ખોલતી જોવા મળશે. સુનીલ શેટ્ટી, અક્ષય કુમાર અને આમિર ખાન પ્રેંક કરીને તેને કેટલી પરેશાન કરતાં હતા તે અંગેના કિસ્સા કરિશ્મા કપૂર ઈન્ડિયન આઈડલ ૧૨ના સેટ પર કહેતી જોવા મળશે. એપિસોડ દરમિયાન કન્ટેસ્ટન્ટ્સ કરિશ્મા કપૂરની ફિલ્મના હિટ સોન્ગ પર પર્ફોર્મન્સ આપશે. કરિશ્માએ જણાવ્યું, સુનીલ શેટ્ટી સૌથી મોટો પ્રેંકસ્ટર હતો અને તે તેને પરેશાન કરવાની એક પણ તક જવા દેતો નહોતો. એકવાર એક એક્શન સીન દરમિયાન તેણે જોયું કે, બે લોકો હાથમાં ખંજર લઈને એકબીજા તરફ દોડી રહ્યા હતા અને બાદમાં ઝઘડવાનું શરુ કરી દીધું. જેને જોઈને કરિશ્મા કપૂર ડરી ગઈ હતી. એક્ટ્રેસ એટલી ડરી ગઈ હતી કે તેણે ઝઘડો રોકવા માટે પોલીસ બોલાવવા માટે પણ કહ્યું હતું. ડરના કારણે તે રડવા પણ લાગી હતી અને ત્યારે સુનીલ શેટ્ટીએ તેને જણાવ્યું કે, આ એક મજાક હતી જે તેની સાથે કરવામાં આવી હતી. આ સાંભળીને કરિશ્મા કપૂર ચોંકી ગઈ હતી. તેણે સુનીલ શેટ્ટીએ કરેલા વધુ એક પ્રેંકનો કિસ્સો જણાવ્યો. તેણે કહ્યું અમે ચેન્નઈમાં એક ફિલ્મનું શૂટિંગ કરી રહ્યા હતા અને મેં જોયું કે થોડેક દૂર એક વ્યક્તિ ધોતી પહેરીને બેઠો છે. તેની આસપાસ ઘણા લોકો હતા. તેથી મને લાગ્યું કે સાઉથનો કોઈ મોટો આર્ટિસ્ટ હશે, જેને હું નહીં જાણતી હોવ. બાદમાં સુનીલ શેટ્ટીએ મને તેને મળવાનું કહ્યું. અમે સાથે ફોટો ક્લિક કર્યો અને ૨૦ મિનિટ સુધી વાત પણ કરી. બાદમાં ધોતી પહેરીને જે શખ્સ બેઠો હતો તેણે મારા ચહેરા પર પફ લગાવી રહ્યો હતો. હું તરત સુનીલ શેટ્ટી પાસે ગઈ અને તે વ્યક્તિ વિશે પૂછ્યું તો કહ્યું કે તેણે મારી સાથે પ્રેંક કર્યો હતો અને તે મેકઅપ આર્ટિસ્ટ હતો. કરિશ્મા કપૂર અને સુનીલ શેટ્ટીએ રક્ષક, કૃષ્ણા, સપૂત અને બાજઃ બર્ડ ઈન ડેન્જર જેવી ફિલ્મોમાં સાથે કામ કર્યું હતું. વર્ષ ૨૦૦૬ સુધી ફિલ્મોમાં કામ કર્યા બાદ એક્ટ્રેસે એક્ટિંગમાંથી બ્રેક લીધો હતો. ૨૦૧૨માં 'ડેન્જરસ ઈશ્ક' થકી કરિશ્મા કપૂરે કમબેક કર્યું હતું. જે ફ્લોપ રહી હતી. છેલ્લે તે ફિલ્મ 'ઝીરો'માં કેમિયો રોલમાં જોવા મળી હતી.