Gujarati News

મુંબઇ: સલમાન ખાન અને દીપિકા પદુકોણે હજી સુધી રૃપેરી પડદે સાથે કામ કર્યું નથી. તેથી બોલીવૂડના માંધાતાઓ આ નવી જોડી બનાવીને તેમને એક તક આપવા મંથી રહ્યા છે. ભૂતકાળમાં ઘણા નિર્માતા-દિગ્દર્શક આ બાબતે નિષ્ફળ ગયા છે પરંતુ સાજિદ નડિયાદવાળા પોતાની કિક ફિલ્મની સિકવલ માટે દીપિકાને લેવાનો વિચાર કરી રહ્યા છે. મૂળ કિક ફિલ્મમાં સલમાન ખાન સાથે જેકલિન ફર્નાન્ડિસે કામ કર્યું હતું. આ ફિલ્મમાં જ જેકલિનનું કામ એટલે કે રોલ પૂરો થઇ જતો હોવાથી તેને ફરી આ ફિલ્મમાં લઇ શકાય એમ નથી. સાજિદ નડિયાદવાળાને ટોચના કલાકારો સાથે જ કામ કરવાનું પસંદ છે. તેથી તે આ વખતે આ ફિલ્મમાં દીપિકા-સલમાન ખાનની જોડીને પ્રથમ વખત રૃપેરી પડદે લાવવાનો શ્રેય લેવા માંગે છે. જોકે આ હજી સુધી આ અંગે કોઇ નિર્ણય લેવાયો નથી. આમ પણ કેટલાય વખતથી સલમાન-દિપીકાને એક જ ફિલ્મમાં સાથે લેવા માટેના પ્રયાસ થયા છે. આ બન્ને કલાકારો પણ સાથે કામ કરવા ઇચ્છે છે, પરંતુ સંજોગો અને સમય તેમને સાથ ન આપ્યા હોવાથી આ શક્ય બન્યું નથી. હવે જોવાનું એ રહે છે કે સાજિદ નડિયાદવાળા આ યશ ખાટી જવામાં સફળ રહે છે કે નહીં.