Gujarati News

મુંબઇ તા. ૯ : ‘પુષ્‍પાઃ ધ રાઇઝ'ની સફળતા બાદ સાઉથનો અભિનેતા અલ્લુઅર્જુન હવે ‘પુષ્‍પાઃ ધ રૂલ'ના શૂટિંગમાં વ્‍યસ્‍ત છે. આ ફિલ્‍મ આવતા વર્ષે સિનેમાઘરોમાં રિલીઝ થવા જઈ રહી છે. આ ફિલ્‍મમાં અલ્લુ અર્જુન ઉપરાંત રશ્‍મિકા મંદન્ના, વિજય સેતુપતિ અને મોહનલાલ મુખ્‍ય ભૂમિકામાં જોવા મળશે. સામે આવી રહેલા રિપોર્ટ્‍સમાં એવો દાવો કરવામાં આવી રહ્યો છે કે મેકર્સે આ ફિલ્‍મ માટે સાઉથની ફેવરિટ એક્‍ટ્રેસ સાઈ પલ્લવીનો પણ સંપર્ક કર્યો છે.

રિપોર્ટ્‍સ અનુસાર આ ફિલ્‍મમાં સાઈ પલ્લવી કેમિયો કરવા જઈ રહી છે. તેણે ‘પુષ્‍પા-૨'ના શૂટિંગ માટે પોતાના વ્‍યસ્‍ત શેડ્‍યૂલમાંથી ૧૦ દિવસ કાઢ્‍યા છે. આ ફિલ્‍મમાં તે આદિવાસી મહિલાની ભૂમિકા ભજવવા જઈ રહી છે. જો કે આ એક સામાન્‍ય મહિલાનું પાત્ર છે, પરંતુ રિપોર્ટ્‍સનું માનીએ તો આ પાત્ર ફિલ્‍મની વાર્તાને આગળ વધારવામાં મહત્‍વની ભૂમિકા ભજવશે. મેકર્સે હજુ સુધી આ સમાચારની સત્તાવાર પુષ્ટિ કરી નથી

‘પુષ્‍પાઃ રાઇઝ'એ થિયેટ્રિકલ રાઇટ્‍સમાંથી રૂ. ૯૦૦ કરોડની કમાણી કરી હતી. તે જ સમયે, હવે નિર્માતાઓ ‘પુષ્‍પાઃ ધ રૂલ' ના થિયેટર અધિકારો માટે એક હજાર કરોડ રૂપિયાની માંગ કરી રહ્યા છે. મેકર્સને લાગે છે કે ‘પુષ્‍પાઃ ધ રૂલ' રિલીઝ થતાની સાથે જ બોક્‍સ ઓફિસ પર ઘણી કમાણી કરશે. એટલું જ નહીં, નિર્માતાઓને એવી પણ આશા છે કે ‘પુષ્‍પાઃ ધ રૂલ' બોક્‍સ ઓફિસ પર એસએસ રાજામૌલીની ફિલ્‍મ ‘RRR'નો રેકોર્ડ તોડી નાખશે.