Gujarati News

ટીવી પરદાનો ચર્ચીત અને લોકપ્રિય કૂકીંગ શો 'માસ્ટર શેફ ઇન્ડિયા' છઠ્ઠી સિઝન માટે તૈયાર છે. આ શોમાં દેશભરના   નિપૂણ કૂક-રસોઇયાઓ વચ્ચે કોણ સારામાં સારી રસોઇ બનાવે છે? તે માટેનો જંગ જામે છે. પુરષ્કાર વિજેતા અને સ્ટાર શેફ વિકાસ ખન્ના આ શોમાં ભાગ લેનારા તમામ કૂકને તમામ માર્ગદર્શન પુરૂ પાડે છે. નવી પેઢીના નવા કૂકની શોધમાં દેશભરમાં અલગ-અલગ શહેરોમાં ઓડિશન લેવાનું શરૂ થઇ ગયું છે. પ્રતિભાશાળી શેફ પંકજ ભદોરીયા તેનું પ્રમુખ ઉદાહરણ છે, જેને માસ્ટર શેફ ઇન્ડિયા શોથી ઘર-ઘરમાં ઓળખ મળી છે. તેણે પહેલી સિઝનમાં વિજય મેળવ્યો હતો. તે સ્પર્ધકોને ઉત્સાહિત કરવા ઓડિશનમાં પણ હાજરી આપે છે. સ્ટાર પ્લસ પર માસ્ટરશેફ ઇન્ડિયાની છઠ્ઠી સિઝન આગામી દિવસોમાં એટલે કે આ મહિનામા અંતમાં શરૂ થશે. શોના પ્રારંભે એટલે કે ૨૦૧૦માં અક્ષય કુમારે કૃણાલ કપૂર અને અજય ચોપરા સાથે જજ તરીકે કામ કર્યુ હતું. આ વખત નિર્ણાયકોમાં વિકાસ ખન્ના, રણવીર બ્રાર અને વિનીત ભાટીયા છે.