Gujarati News

જામનગર, તા.૧૭ : જામનગર જીલ્લાના વિભાપર ગામમાં પતિ-પત્ની ઔર વોહ ના કિસ્સામાં તકરાર થઇ છે, અને પત્ની તથા તેના બે પાડોશીઓએ પતિ અને તેની નવી પ્રેમિકાને ધોકાવી નાખ્યાની તથા છરી વડે હુમલો કરી દીધાની ઘટના સામે આવી છે. જે મામલે પત્ની સહિત ત્રણ સામે પોલીસ ફરિયાદ નોંધાવી છે. જ્યારે પતિને જી.જી.હોસ્પિટલમાં સારવાર લઇ રહ્યો છે.

પોલીસ સ્ટેશનમાં નોંધાયેલી ફરિયાદ મુજબ જામનગર જિલ્લાના વિભાપર ગામે પત્ની સહિતના શખ્સોએ એક યુવાનને માર મારી છરી વડે ગંભીર ઇજા પહોંચાડયાનો બનાવ બન્યો હતો. જેમાં ઈજાગ્રસ્ત યુવાન પત્નીને છોડીને લીવ-ઇન રીલેશનશીપ રહેતો હોવાનું સામે આવ્યું છે. જામનગર તાલુકાના ખીમરાણા ગામમાં રહેતા અને કડિયા કામ કરતા છગનભાઈ કાનજીભાઈ માંડવીયા કે જેના લગ્ન અગાઉ વિભાપર ગામની ગીતાબેન નામની મહિલા સાથે થયા હતા, અને પતિ-પત્ની તરીકે બંને સાથે રહેતા હતા. પરંતુ છેલ્લા દોઢેક મહિનાથી પતિ-પત્ની વચ્ચે ખટરાગ થયો હતો, અને પતિ છગનભાઈ વિભાપરના બદલે ખિમરાણા ગામે રહેવા ચાલ્યા ગયા હતા. જેથી ગીતાબેન અને છગનભાઇ વચ્ચે માથાકૂટ ચાલતી હતી.

દરમિયાન ગઇકાલે છગનભાઈ પોતાની સાથે કડિયા કામ કરતા રમેશભાઇ કે જે વિભાપર ગામમાં રહે છે. તેને મળવા માટે પોતાની પ્રેમિકા રંજનબેનને લઈને આવ્યા હતા, દરમિયાન છગનભાઈની પત્ની ગીતાબેન તથા અન્ય પાડોશીઓ મુકેશભાઈ ધવલભાઇ કોળી અને ધવલભાઈ કોળીને જાણકારી થઈ જતાં તેઓ રમેશભાઈના ઘર પાસે પહોંચ્યા હતા અને છગનભાઇ સાથે માથાકૂટ કરી હતી. આરોપી મુકેશે છરી વડે હુમલો કરી માથા તથા જમણા પગના સાથળના ભાગે ઘા મારી ઇજા પહોંચાડી હતી ત્યારે અન્ય આરોપીઓએ ઢીકાપાટુનો માર માર્યો હતો. ઘટનામાં ઈજાગ્રસ્ત પતિ અને તેની પ્રેમિકા બન્નેને સારવાર માટે જામનગરની જી.જી.હોસ્પિટલમાં લઈ જવાયા હતા.

આ હુમલાના બનાવ અંગે છગનભાઈએ પોતાની પત્ની ગીતાબેન ઉપરાંત પાડોશીઓ મુકેશ ધવલભાઇ અને ધવલભાઈ કોળી સામે બેડી મરીન પોલીસ સ્ટેશનમાં હુમલા અંગેની ફરિયાદ નોંધાવી છે. પોલીસે ચારેય વ્યક્તિ વિરુદ્ધ ફરિયાદ નોંધી કાયદેસરની કાર્યવાહી હાથ ધરી છે. જેમાં છગનભાઇ છેલ્લા દોઢ મહિનાથી પોતાની પત્નીને છોડીને ખીમરાણા ગામે મૈત્રી કરારથી રહેતા હોય જેનો ખાર રાખીને હુમલો કરવામાં આવ્યો હોવાનું સામે આવ્યું છે.