Gujarati News

Gujarati News

News of Sunday, 14th January 2018

નૃપેન્દ્ર મિશ્રા સીજેઆઈના નિવાસે કેમ ગયા?, વડાપ્રધાન ખુલાસો કરે: કોંગ્રેસ

સીજેઆઈના નિવાસની મુખ્ય સચિવની મુલાકાતનો વિવાદ વકર્યો

નવી દિલ્હી, : વડાપ્રધાન નરેન્દ્ર મોદીના મુખ્ય સચિવ નૃપેન્દ્ર મિશ્રા ચીફ જસ્ટિસ ઓફ ઈન્ડિયા દીપક મિશ્રાના નિવાસ સ્થાન નજીક જોવા મળતા વિવાદ સર્જાયો છે. કોંગ્રેસે કહ્યું છે કે, કેન્દ્ર સરકારે સુપ્રીમ કોર્ટમાં સર્જાયેલા સંકટમાં દખલગીરી નહીં કરવાની જાહેરાત કરી હતી. આ સંજોગોમાં વડાપ્રધાન મોદીના સચિવ નૃપેન્દ્ર મિશ્રાએ સીજેઆઈની મુલાકાત કેમ લીધી એ મુદ્દે સ્પષ્ટતા કરવી જોઈએ. આશ્ચર્યની વાત એ છે કે, નૃપેન્દ્ર મિશ્રા સીજેઆઈ દીપક મિશ્રાના નવી દિલ્હી સ્થિત સત્તાવાર નિવાસ સ્થાને સાંજે પાંચ વાગ્યે પહોંચ્યા હતા. જોકે, ત્યારે ઘણાં સમય સુધી દરવાજો ખૂલ્યો ન હતો. પરિણામે નૃપેન્દ્ર મિશ્રાએ કારમાં પરત જતા રહેવું પડયું હતું. ત્યાર પછી વિપક્ષોએ કહ્યું હતું કે, વડાપ્રધાને સીજેઆઈના નિવાસ સ્થાને 'સ્પેશિયલ મેસેન્જર' મોકલવાની કેમ જરૂર પડી. એ મુદ્દે વડાપ્રધાન નરેન્દ્ર મોદીએ ખુલાસો કરવો જોઈએ. આ ઘટનાના કેટલીક સમાચાર ચેનલોએ ફૂટેજ દર્શાવવાનું શરૂ કરતા વિવાદ સર્જાયો હતો. સુપ્રીમના ચાર જજે સીજેઆઈ સામે અનેક મહત્ત્વના કેસ પસંદગીની બેન્ચને સોંપતા હોવાનો આરોપ લગાવ્યો છે, જેમાં સીબીઆઈ જજ બી. એચ. લોયાના શંકાસ્પદ મૃત્યુના કેસનો પણ સમાવેશ થાય છે.

 

(11:36 am IST)
  • સંયુક્ત રાષ્ટ્ર સંઘમાં ભારતના સ્થાયી પ્રતિનિધિ સૈયદ અક્બરુદીનનું ટ્વીટર એકાઉન્ટ રવિવારે સવારે હૈક થયું છે. જોકે તેનાથી બેફિકર આ રાજદ્વારીએ કહ્યું હતું કે તેના ટ્વીટરને હૈક કરીને તેને જુકાવી શકાશે નહીં. અજાણ્યા હૈંકરોએ બે ફોટા અને એક વિડિઓ પોસ્ટ કરી છે અને અકબરૂદ્દીનના ટ્વીટર એકાઉન્ટના નામમાં @AkbaruddinIndia થી બદલીને R@AkbaruddinSyed કરી નાખ્યું છે. access_time 4:34 pm IST

  • દક્ષિણ ભારતના સુપરસ્ટાર રજનીકાંત બાદ હવે કમલ હાસન રાજકારણમાં એન્ટ્રી મારશે. કમલ હાસને ચેન્નઈમાં વિકાસ એવોર્ડ સમારંભમાં હાજરી આપતા જણાવ્યું કે તે 18 જાન્યુઆરીએ રાજનીતિમાં જોડાવવાની યોજના અંગે ખુલાસો કરશે. 26 જાન્યુઆરીના રોજ તેઓ તમિલનાડુની યાત્રા શરૂ કરશે. access_time 3:54 pm IST

  • અમેરિકાના કેલિફોર્નિયા ડિપાર્ટમેન્ટ ઑફ ફાયર એન્ડ ફોરેસ્ટ્રી પ્રોટેક્શનના જણાવ્યા મુજબ કેલિફોર્નિયાના મોન્ટેસીટોમાં મંગળવારે થયેલ ભયંકર ભૂસ્ખલનના પરિણામે ઓછામાં ઓછા 20 લોકોના મોત થયા છે અને ચાર લોકો હજુ પણ લાપતા છે. access_time 12:25 am IST