Gujarati News

નવી દિલ્હી, તા.૧૦: તમારા મોબાઈલ ફોન વિના તમે કેટલાં સમય સુધી રહી શકો? કદાચ કલાક સુધી કે પછી તે પણ નહીં. તમારી જાતને જાણે એકલી-એકલી અનુભવવા લાગશો. ઈન્ટરનેટની મદદથી આપણે દુનિયાને પોતાની હથેળીમાં હોવાનો અહેસાસ કરીએ છીએ. દુનિયાના કોઈ ખૂણામાં ભલે કંઈ પણ થતું હોય, ઈન્ટરનેટની મદદથી તમે મોબાઈલમાં લાઈવ જોઈ શકો છો. મિનિટોમાં કોઈપણ માહિતી લાકો-કરોડો કિલોમીટર સુધી પહોંચી જાય છે. ઈન્ટરનેટ છે જ કમાલની વસ્તુ. તમે વિચારી શકો છો કે ઈન્ટરનેટ પર માત્ર ૧ મિનિટમાં કેટલું થઈ શકે છે.

ઈન્ટરનેટ દ્વારા સોશિયલ મેસેજિંગ એપ વોટ્સએપ પર ૧ મિનિટમાં લગભગ ૪.૫ કરોડ મેસેજ મોકલી શકાય છે. ખાસ કરીને ૩૧ ડિસેમ્બરની સાંજથી રાતનો સમય સૌથી વધારે વ્યસ્ત હોય છે. જયારે બધા એક-બીજાને ન્યૂ યર વિશ કરતા હોય છે.

હવે વાત કરીએ ઈ-મેલની તો ૧ મિનિટમાં ૧૮ કરોડ ખાનગી અને ઔપચારિક મેલ મોકલવામાં આવે છે. આ જીમેલ, આઉટલુક, યાહૂ, હોટમેલ વગેરે લોકપ્રિય ઈમેલ સર્વિસ છે. ઓનલાઈન શોપિંગ દ્વારા લોકો દર મિનિટે ૧૦ લાખ રૂપિયાનો સામાન  ખરીદે છે.

૧ મિનિટમાં ગૂગલ પર લગભગ ૩૮ લાખ સર્ચ કરવામાં આવે છે. વિચારો કે કંપનીનું સર્વર કેટલું મજબૂત હશે કે ક્રેશ થતું નથી. ગૂગલના એપ સ્ટોર અને એપલના સ્ટોર પર ૧ મિનિટમાં લગભગ ૩.૯૦ લાખ એપ ડાઉનલોડ કરવામાં આવે છે.

હવે વાત ફેસબુકની કરીએ. આ લોકપ્રિય સોશિયલ એપ પર ૧ મિનિટ એટલે માત્ર ૬૦ સેકંડમાં ૧૦ લાખ લોકો લોગ ઈન કરે છે. ફેસબુકની માલિકીના ઈન્સ્ટાગ્રામ પર ૧ મિનિટમાં ૩,૪૭,૨૨૨ ફોટો અપલોડ કરવામાં આવે છે.

દુનિયાના સૌથી મોટા વીડિયો પ્લેટફોર્મ યૂ-ટ્યૂબ પર ૧ મિનિટમાં ૪૫ લાખ વીડિયો જોવામાં આવે છે. તેના પર લોકો ગીત સાંભળી પણ શકે છે. તો નેટફ્લિકસ પર ૧ મિનિટમાં ૬.૯૪ લાખ કલાકના વીડિયો જોવામાં આવે છે.