<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 22nd November 2026

મોરબી-વાંકાનેર અને હળવદમાં અપમૃત્યુના જુદા જુદા બનાવોમાં ચાર યુવાનોના કરુણ મોત

લાતી પ્લોટમાં પટકાતા, સિરામિક ક્વાર્ટરમાં આપઘાત, વાડીમાં ઝેરી દવા અને ટ્રેક્ટરની અડફેટે ચાર યુવાનોના મૃત્યુ

મોરબી : મોરબી, વાંકાનેર અને હળવદ પંથકમાં અપમૃત્યુના જુદા જુદા ચાર બનાવોમાં ચાર યુવાનોના મોત નીપજ્યા હતા. મોરબીના ત્રાજપર ખારી વિસ્તારના રહેવાસી સંદીપ ઉર્ફે સોમો રમેશભાઈ પીપળીયા (ઉ.વ.35) ગત તા. 20 ના રોજ લાતીપ્લોટ શેરી નં 6 ના ખૂણા પાસે ખોડીયાર પાન દુકાનના ઓટલા પરથી નીચે પડી જતા માથામાં ઈજા પહોંચી હતી અને મોરબી બાદ વધુ સારવાર અર્થે રાજકોટ હોસ્પિટલ ખસેડાતા સારવાર દરમિયાન તેનું મોત થયું હતું, જે મામલે મોરબી એ ડીવીઝન પોલીસે તપાસ ચલાવી હતી. બીજા બનાવમાં મોરબીના લખધીરપુર રોડ પર આવેલ મેટ્રો સ્ટાર સિરામિકના લેબર ક્વાર્ટરમાં રહીને કામ કરતા મુકેશકુમાર રાજકુમાર (ઉ.વ.19) ગત તા. 21 ના રોજ ફેકટરીના લેબર ક્વાર્ટરમાં કોઈ કારણોસર ગળેફાંસો ખાઈ લેતા મોત થયું હતું અને પોલીસે મૃતદેહ પીએમ અર્થે હોસ્પિટલ ખસેડી આપઘાતનું કારણ જાણવા વધુ તપાસ ચલાવી હતી.

વાંકાનેર તાલુકાના તરકીયા ગામની સીમમાં વાડીએ રહેતા અને મૂળ ચોટીલા તાલુકાના નાળીયેરી ગામના વતની સંજયભાઈ બીજલભાઈ સરવૈયા (ઉ.વ.26) વાડીએ કોઈ કારણોસર ઝેરી દવા પી લેતા તેમનું મોત નીપજ્યું હતું, જે અંગે વાંકાનેર તાલુકા પોલીસે તપાસ હાથ ધરી હતી.

હળવદ તાલુકાના કોયબા ગામના રહેવાસી મહેશભાઈ જાલુભાઈ ચૌહાણ (ઉ.વ.36) ગત તા. 20 ના રોજ મિત્ર મેહુલ પટેલની વાડીએ મગફળી સાફ કરવાના મશીન લઈ મેહુલના ટ્રેક્ટર સાથે થ્રેશર જોડી મગફળી સાફ કરતા હતા અને થ્રેસરનું સેટિંગ કરતા હતા ત્યારે અચાનક ટ્રેક્ટરની લીપ ઉંચી થઈ જતા તેમનું માથું ટોપલિંગ અને ટ્રેક્ટર પેટી વચ્ચે આવી ગયું હતું, જેમાં માથામાં ગંભીર ઈજા પહોંચતા સારવાર દરમિયાન તેમનું મોત થયું હતું અને હળવદ પોલીસે બનાવ મામલે તપાસ ચલાવી હતી. અગાઉ પણ શહેર અને ગ્રામ્ય વિસ્તારોમાં અકસ્માત, કામગીરી દરમિયાનની બેદરકારી કે આપઘાતના બનાવોમાં યુવાનોના જીવ ગયા હોવાના કિસ્સાઓ સામે આવતા રહ્યા છે.

હાલની સ્થિતિ અને આગામી પગલાં અંગે વાત કરીએ તો, મોરબી એ ડીવીઝન, મોરબી તાલુકા, વાંકાનેર તાલુકા અને હળવદ પોલીસ દ્વારા ચારેય અપમૃત્યુના બનાવોમાં પોસ્ટમોર્ટમ સહિતની પ્રાથમિક કાયદેસરની કાર્યવાહી પૂર્ણ કરીને પરિવારજનોના નિવેદનો નોંધવા સહિતની તપાસ આગળ ધપાવવામાં આવી રહી છે. હવે પછીના તબક્કામાં આપઘાત અને ઝેરી દવા પીવાના ચોક્કસ કારણો તેમજ લાતી પ્લોટ અને કોયબાના અકસ્માત અંગેના પુરાવા અને વિગતોના આધારે પોલીસ દ્વારા જરૂરી કાયદેસરની પ્રક્રિયા પૂર્ણ કરવામાં આવશે.

(3:37 PM IST)