Gujarati News

નવી દિલ્હી,તા.૧૩: સાઉથ સુપરસ્ટાર અલ્લુ અર્જુન અને રશ્મિકા મંદાન્નાની ફિલ્મ 'પુષ્પા' લોકોને ખુબ જ પસંદ આવી છે. અને સોશિયલ મીડિયામાં અલ્લુ અર્જુનના ડાયલોગની રીલ્સ ખુબ જ વાયરલ થઈ રહી છે. તેવામાં ગુજરાતી ક્રિકેટર રવીન્દ્ર જાડેજા ઉપર પણ 'પુષ્પા'નો ફીવર જોવા મળી રહ્યો છે. અગાઉ રવીન્દ્ર જાડેજા દ્વારા અલ્લુ અર્જુનના ડાયલોગનો વિડીયો બનાવી શેર કરવામાં આવ્યો હતો અને હવે તેના દ્વારા અલ્લુ અર્જુનના લુકની નકલ કરવામાં આવી છે. જાડેજાનો આ લુક લોકોને ખુબ પસંદ આવી રહ્યો છે.

રવીન્દ્ર જાડેજા અને શિખર ધવન પુષ્પામાં અલ્લુ અર્જુનના લુક અને ડાયલોગના માસ ટ્રેન્ડમાં જોડાઈ ગયા છે. અલ્લુ અર્જુનની એકિટંગે ભાષાની તમામ સીમાઓને તોડી દીધી છે અને દેશ જ નહીં સમગ્ર દુનિયાના લોકો તેના દીવાના થઈ ગયા છે. સમગ્ર દેશમાં પુષ્પા ફિલ્મ સુપરહિટ રહી છે અને કરોડો રૂપિયાની કમાણી કરી છે.

રવીન્દ્ર જાડેજાએ સોશિયલ મીડિયામાં અલ્લુ અર્જુનના લુકની નકલ કરતો ફોટો શેર કર્યો છે. આ ફોટોમાં અલ્લુ અર્જુનની જેમ જ રવીન્દ્ર જાડેજાએ મોઢામાં બીડી સાથેનો ફોટો શેર કર્યો છે. આ ફોટોમાં અલ્લુ અર્જુનની આંખોમાં દેખાતી આક્રમકતાની પણ નકલ રવીન્દ્ર જાડેજાએ કરી છે. ફોટોમાં અલ્લુ અર્જુનની હેર સ્ટાઈલથી દાઢી સહિતનો લુક જાડેજા પર જોરદાર લાગી રહ્યો છે. જો કે, રવીન્દ્ર જાડેજાએ સાથે લખ્યું છે કે, ફકત ફોટો પડાવવા માટે તેણે બીડી લીધી છે. સ્મોકિંગ અને તંબાકુનું સેવન સ્વાસ્થ્ય માટે હાનિકારક છે અને તેનાથી કેન્સર થઈ શકે છે. તેનું સેવન ન કરવું જોઈએ.

આ ઉપરાંત શિખર ધવને પણ પુષ્પાના ડાયલોગનો વિડીયો સોશિયલ મીડિયામાં શેર કર્યો હતો. ઉલ્લેખનીય છે કે, પુષ્પાના ડાયલોગ પર ઈન્સ્ટાગ્રામ પર અત્યાર સુધી હજારોની સંખ્યામાં રીલ્સ બની ચૂકી છે. પુષ્પા ફિલ્મમાં અલ્લુ અર્જુન લીડ રોલમાં જોવા મળે છે, જયારે રશ્મિકા મંદાન્નાનો રોલ પણ ઘણો મહત્વપુર્ણ છે. આ ફિલ્મને સુકુમાર દ્વારા ડાયરેકટ કરવામાં આવી છે. જયારે નવીન પેર્નેની અને વાય. રવિ શંકર દ્વારા આ ફિલ્મને પ્રોડ્યુસ કરવામાં આવી છે. સાઉથ વર્ઝનમાં આ ફિલ્મ ઓટીટી પ્લેટફોર્મ ઉપર આવી ચૂકી છે, જયારે હિન્દી વર્ઝન ૧૪ જાન્યુઆરીથી ઓટીટી પ્લેટફોર્મ ઉપર જોવા મળશે.