Gujarati News

રાજકોટ તા. ર૮: રાજકોટ લોકસભા બેઠકના ભાજપના ઉમેદવાર શ્રી પરષોત્તમભાઇ રૂપાલાએ તાજેતરમાં ક્ષત્રિય સમાજ વિશે કરેલી ટીપ્‍પણી અંગે કેન્‍દ્રિય ચૂંટણી પંચને લેખીતમાં ફરિયાદ થતા ચૂંટણી પંચે રાજકોટ જીલ્લા કલેકટરને તપાસના આદેશો કરતા, કલેકટરે આ મામલે રાજકોટ મ્‍યુ. કોર્પોરેશનના ડે. કમિશ્‍નર અને આચાર સંહિતાના નોડલ ઓફીસરને તપાસ સોંપી છે.

જીલ્લા કલેકટર શ્રી પ્રભવ જોષીએ ઉમેર્યું હતું કે ચૂંટણી પંચે કલેકટરને ઇ-મેઇલથી તપાસ કરવાની સૂચના આપી છે. આ મામલાની તપાસ આચાર સંહિતાની કમિટીને અપાઇ છે, જેના નોડલ ઓફીસર રાજકોટ મહાનગરપાલિકાના ડે. કમિશ્‍નર છે. જેઓ અહેવાલ આપશે, બાદ તે રીપોર્ટ ચૂંટણી પંચને મોકલાશે.

અત્રે એ નોંધનીય છે કે શહેરના પરસાણાનગર વિસ્‍તારમાં યોજાયેલા કાર્યક્રમમાં ક્ષત્રિય સમાજ વિશે ટીપ્‍પણી થતા ભારે વિવાદ સર્જાયો છે, આ પછી કેન્‍દ્રિય મંત્રીએ આ વિધાનો બદલ જાહેરમાં માફી માંગી લીધી છે.