Gujarati News

રાજકોટઃ ઘણીવાર નવજાત શીશુઓને મજબુરી કે પછી બીજા કારણોસર ત્યજી દેવામાં આવતાં હોય છે. કચરા પેટીઓ, અવાવરૂ જગ્યાઓ, ઝાડીઓમાં ફેંકી દેવામાં આવતાં હોય છે. આ કારણે આવા બાળકો પર જોખમ ઉભુ થઇ જતું હોય છે. નવજાત શીશુઓને ગમે ત્યાં ત્યજી દેવાને બદલે તેને યોગ્ય જગ્યાએ મુકવામાં આવે તો તેનો જીવ બચી જાય. આ માટે રાજકોટની સિવિલ હોસ્પિટલના કે. ટી. ચિલ્ડ્રન વિભાગમાં આજથી 'અનામી પારણું' ખુલ્લુ મુકવામાં આવ્યું છે. કલેકટરશ્રી મહેશબાબુના હસ્તે આ પારણુ ખુલ્લુ મુકાયુ હતું. કે. ટી. ચિલ્ડ્રન વિભાગના ડો. પંકજ બુચ તેમજ ડો. મુકેશ પટેલ તથા બીજો સ્ટાફ આ પ્રસંગે હાજર હતો. અનામી પારણામાં બાળકને મુકીને બાજુમાં આવેલી બેલનું બટન દબાવવાનું રહેશે. એ પછી આ બાળકની સારસંભાળની જવાબદારી કલેકટર તંત્રની રાહબરીમાં કે. ટી. ચિલ્ડ્રન હોસ્પિટલનો સ્ટાફ રાખશે.

બાળક મુકી જનાર કોઇપણ વ્યકિતની તંત્ર દ્વારા ઓળખ છતી કરવામાં આવશે નહિ તેમ જણાવાયું છે. (ફોટોઃ સંદિપ બગથરીયા)