Gujarati News

 જમ્‍મુ,તા.૨૪ : કોંગ્રેસની ભારત જોડો યાત્રા મંગળવારે જમ્‍મુના નગરોટાના શીતલીથી શરૂ થઈ હતી. અહીંથી કાફલો લગભગ પાંચ કિલોમીટર ચાલીને આગળ વધ્‍યો હતો. ત્‍યારબાદ વાહનોમાં સવાર થઈને યાત્રા ઝજ્જર કોટલી જવા રવાના થઈ હતી. આજે અહીં બપોરનું ભોજન બાદ રેમ્‍બલ ઉધમપુરથી પદયાત્રા ફરી શરૂ થશે.

 જમ્‍મુના નગરોટા ખાતે તેમની ભારત જોડો યાત્રા દરમિયાન સુરક્ષા દળોના જવાનોને મળ્‍યા. કેમ્‍પસના કાંટાળા તાર પાછળ ઉભેલા સૈનિકો પોતાના મોબાઈલ કેમેરા વડે ફોટોગ્રાફ લઈ રહ્યા હતા. આ જોઈ રાહુલ ગાંધી તેમની નજીક ગયા. તેમણે જવાનો સાથે હાથ મિલાવ્‍યા અને તેમના ખબર-અંતર પૂછયા હતા.

 પદયાત્રા દરમિયાન રાહુલ એક નાની છોકરી સાથે મસ્‍તી કરતા જોવા મળ્‍યા હતા રાહુલ ગાંધી નગરોટામાં પદયાત્રા દરમિયાન એક નાની છોકરીને મળ્‍યા હતા. રાહુલ ગાંધી પરિવાર સાથે યાત્રામાં પહોંચેલી યુવતી સાથે મસ્‍તી કરતા જોવા મળ્‍યા હતા.

 બોલિવૂડ અભિનેત્રી અને રાજકારણી ઉર્મિલા માતોંડકર મંગળવારે રાહુલ ગાંધીની ભારત જોડો યાત્રામાં જોડાઈ હતી. યાત્રામાં જોડાતા પહેલા સવારે જમ્‍મુમાં ઉર્મિલા માતોંડકરે એક વિડીયો શેર કરતા કહ્યું કે તેમના માટે આ યાત્રા રાજકારણ કરતા વધુ સામાજિક મહત્‍વ ધરાવે છે. તે સામાજિક મૂલ્‍યો પર આધારિત આ કાફલામાં જોડાઈ રહી છે. આ યાત્રામાં ઘણો પ્રેમ, તોહ, વિશ્વાસ અને ભારતીયતા છે અને ભારતીયતાનો આ દીવો દરેકના મનમાં આ રીતે જ જલતો રહેવો જોઈએ.

 ભારત જોડો યાત્રા જમ્‍મુના સિદ્દામાં ફોરેસ્‍ટ સિકયુરિટી ફોર્સ ગ્રાઉન્‍ડ ખાતે રાત્રિ આરામ કર્યા બાદ સવારે સાત વાગ્‍યે શીતલી (નગરોટા ચેકપોસ્‍ટ પાસે)થી શરૂ થઈ હતી. યાત્રા નગરોટાના જૂના રૂટ પરથી આગળ વધી હતી. આમાં ઝજ્જર કોટલી સુધી મુસાફરી કરવાની દરખાસ્‍ત છે, જેમાંથી આગળની યાત્રા રેમ્‍બલે ઉધમપુરથી શરૂ થશે.

 કોંગ્રેસના સમયપત્રક અનુસાર યાત્રા ૨૫ જાન્‍યુઆરીએ સવારે ૮ વાગ્‍યે મૈત્રા રામબનથી શરૂ થશે, ખોબાગ ખાતે રોકાશે અને બપોરે ૨ વાગ્‍યે હરપુરા બનિહાલ માટે રવાના થશે. આ દરમિયાન સાંજે ૪ વાગ્‍યે લેંગેડ બનિહાલમાં કોર્નર મીટિંગનું આયોજન કરવામાં આવશે. આ યાત્રા પ્રજાસત્તાક દિવસે વિશ્રામ કરશે.