Gujarati News

નવી દિલ્‍હી : ફરી એક વખત નેપાળના વિમાનો ભારતીય સરહદમાં પ્રવેશ્યાનો કિસ્સો સામે આવ્યો છે. સશસ્ત્ર સીમા બળ સહિત ભારતીય સુરક્ષા એજન્સીઓ એલર્ટ થઇ ગઇ છે. જણાવવામાં આવી રહ્યું છે કે નેપાળનું વિમાન લાંબા સમયથી નેપાળને અડીને આવેલા બિહારના મહારાજગંજ જિલ્લાના સોનૌલી ગામ પર ચક્કર મારી રહ્યુ હતુ અને થોડા સમય માટે પરત ફર્યું હતું.

મળતી માહિતી મુજબ, નેપાળના ભૈરવ ગૌતમ બુદ્ધ એરપોર્ટ પર લેન્ડિંગ દરમિયાન ત્યાંથી એક વિમાન ભારતીય સરહદની અંદર લગભગ 400 મીટર પ્રવેશ્યું હતુ આ ઘટના શુક્રવારે બપોરે 1 વાગ્યે સામે આવી છે. લાંબા સમય સુધી ભારતીય સરહદમાં અવરજવર કર્યા બાદ વિમાન નેપાળ પરત ફર્યું.

આ ઘટના પછી, ભૈરહવા સ્ટેશનના સુપરિન્ટેન્ડન્ટ દર્શન ધીમરેએ કહ્યું કે ખરાબ હવામાન અને લેન્ડિંગ સિગ્નલોની ગેરહાજરીને કારણે આવી સમસ્યાઓ ઉભી થાય છે. જ્યારે પણ ઉત્તર દિશામાં હવામાન ખરાબ થાય છે ત્યારે વિમાનને લેન્ડિંગ માટે દક્ષિણથી આવવું પડે છે. વિમાનના સુરક્ષિત પરિભ્રમણ માટે ભારતીય સરહદ પર જવું પડે છે. આ ત્યારે જ થાય છે જ્યારે હવામાન ખરાબ હોય.

તે જ સમયે, નેપાળ એરપોર્ટ ઓથોરિટીના અધિકારીઓનું કહેવું છે કે ભૈરવ એરપોર્ટ પર સુરક્ષિત ઉતરાણ માટે વિમાનને લગભગ 4 કિમીની ત્રિજ્યાની જરૂર છે. ભારતની સરહદ માત્ર દક્ષિણ દિશામાં ત્રણ કિલોમીટરના અંતરે પડે છે, તેથી વિમાને મજબૂરીને કારણે ભારતીય સરહદમાં પ્રવેશ કરવો પડે છે. વિમાનનો પાયલોટ ગોરખપુર, વારાણસી એરપોર્ટના એર ટ્રાફિક કંટ્રોલની પરવાનગી સાથે ભારતીય વિસ્તારમાં ઉડાન ભરે છે.

જો કે, આ પ્રથમ વખત નથી કે જ્યારે નેપાળથી વિમાન ભારતીય ક્ષેત્રમાં ઘુસી ગયું હોય. આ પહેલા પણ ઘણી વખત નેપાળના વિમાનો ભારતીય સરહદમાં આવી ચડે છે. વિદેશી વિમાન ભારતીય સરહદમાં પ્રવેશતાની સાથે જ તેની માહિતી રડાર દ્વારા પ્રાપ્ત થાય છે.

તમારા ફોન પર લેટેસ્ટ ન્યૂઝ અપડેટ્સ સૌથી પહેલા મેળવવા માટે હમણાં જ Sandesh ની મોબાઇલ એપ્લિકેશન ડાઉનલોડ કરો