Gujarati News

રાજકોટ, તા., ૧૬: વિશ્વ હિન્દુ પરીષદના  આંતરરાષ્ટ્રીય પ્રમુખ જે રીતે રહસ્યમય સંજોગોમાં ગૂમ થયા અને જે રીતે બેભાન અવસ્થામાં જે સ્થળેથી મળી આવ્યા અને જે હોસ્પીટલમાં સારવાર માટે દાખલ કરવામાં આવ્યા તે બંન્ને સ્થળો યોગાનુયોગ ચોક્કસ બાબતો માટે ખુબ જ જાણીતા હોવાનું પોલીસ સુત્રો જણાવી રહયા છે.

પ્રવિણભાઇ તોગડીયા શાહીબાગ વિસ્તારના કોતરપુર નજીકથી ખોડીયાર મંદિર પાસેથી મળી આવ્યા. આ સ્થળે જ ભુતકાળમાં  ઇશરત જહાં એન્કાઉન્ટર સહિતની ઘટનાઓ ઘટી હતી.

યોગાનુયોગ પુર્વ ડીજીપી પૃથ્વીપાલ પાન્ડેયજી સામે એન્કાઉન્ટર સંદર્ભેની સીબીઆઇ કાર્યવાહી સંદર્ભે તેઓ સામે પગલા લેવામાં આવ્યા ત્યારે તે સમયે તેઓ પણ ચંદ્રમણી હોસ્પીટલમાં જ દાખલ કરવામાં આવ્યા હતા.

દરમિયાન પ્રવિણભાઇ તોગડીયાને હોસ્પીટલે પહોંચાડવા માટે ૧૦૮ એમ્બ્યુલન્સ માટે કોલ કરી હોસ્પીટલ પહોંચાડનાર વ્યકિતની શોધખોળ ક્રાઇમ બ્રાન્ચ દ્વારા ચાલી રહી છે. બીજી તરફ પ્રવિણભાઇ સાથે રહેલા શખ્સની ઓળખ થઇ છેે. તેનું નામ ધીરૂભાઇ કપુરીયા હોવાનું જાણવા મળે છે.  દરમિયાન પ્રવિણભાઇ તોગડીયાને ઝેડ પ્લસ સુરક્ષા આપવામાં આવી છે. નિયમાનુસાર તેમની સુરક્ષામાં રહેલા કમાન્ડો કે અધિકારીઓએ તેમને એકલા છોડવાના હોતા નથી. આમ છતાં કયાં સંજોગોમાં તેમને એકલા છોડવામાં આવ્યા? આ માટે કંઇ બાબત જવાબદાર હતી? તેની તપાસ અમદાવાદના ઝોન-પ ના ડીસીપી આર.જે.પારગીને સુપ્રત થતા તેઓએ તપાસનો ધમધમાટ શરૂ કર્યો છે.