Gujarati News

મુંબઈ,તા.૧૩: ચા ભારતીયો માટે જીવનના સાર જેવી છે. ઘરમાં કોઈ મહેમાન આવે, વરસાદ, હોય, ઠંડી હોય, થાક લાગ્યો હોય, માથું દુઃખતું હોય કે પછી આળસ આવી રહી હોય, આ બધા માટે આપણને એક જ વિકલ્પ સમજમાં આવે છે અને તે છે ચા. પરંતુ ચાની બાબતમાં એક ભૂલ આપણામાંથી મોટાભાગના લગભગ રોજ કરે છે.

આ ભૂલ છે- એક વખત વધારે ચા બનાવી દેવાની અને પછી તેને ગરમ કરીને પીધે રાખવાની. પણ, શું તમને ખબર છે આવું કરવાથી શરીરને ઘણું જ નુકસાન થાય છે? ચાલો જાણીએ ઠંડી થઈ ગયેલી ચાને ગરમ કરી શા માટે ફરી ન પીવી જોઈએ?

ચાને બનાવ્યા પછી મૂકી રાખી હોય અને તેને ફરી ગરમ કરીને પીવાથી સૌથી મોટું નુકસાન એ છે કે, તેનાથી ચાનો સ્વાદ અને સુગંધ ગાયબ થઈ જાય છે. એટલું જ નહીં. ચાને ફરીથી ગરમ કરવાથી તેમાં રહેલા પોષક તત્વો પણ રહેતા નથી.

જયારે પણ તમે ઠંડી ચાને ફરીથી ગરમ કરીને પીવો છો ત્યારે તેમાં રહેલા બધા તત્વો નાશ પામે છે. આવી ચા પીવાથી ઝાડા, ઉલટી, પેટમાં દુખાવો, પાચનમાં સમસ્યા વગેરે જેવી સમસ્યા થઈ શકે છે. એટલા માટે ઠંડી થઈ ગયેલી ચાને ફરીથી ગરમ કરીને ન પીવી જોઈએ. જો તમે ચાને લાંબા સમય સુધી એટલે કે લગભગ ૪ કલાક સુધી છોડી દો છો, તો આ દરમિયાન ચામાં ઘણા બેકટેરિયા અને જીવાણું પ્રવેશ કરી જાય છે. એવામાં જો તમે ચાને ફરી ગરમ કરો છો તો તેનાથી સ્વાદ તો બદલાઈ જ જાય છે, તે ઉપરાંત ચાની અંદર રહેલા બધા ફાયદાકારક પોષકતત્વો પણ બહાર નીકળી જાય છે.

મોટાભાગના ભારતીયો દૂધવાળી ચા પીવે છે. તેમાં જલદી માઈક્રોબ્સ પેદા થવાનો ખતરો રહે છે. તે ઉપરાંત જો તમે હર્બલ ટી ગરમ કરીને પીવો છો તો તેમાં રહેલા બધા ગુણ પણ બહાર નીકળી જાય છે. એટલે ચાને વધારે સમય સુધી રાખી ન મૂકો અને ફરી ગરમ કરી ન પીવો.

જો તમે ચાને વધુ પડતા શોખીન છો, તો સ્પષ્ટ છે કે, તમે સ્વાદમાં કોઈ પ્રકારની સમજૂતી નહીં ઈચ્છતા હોવ. પરંતુ. જો તમે એક ચાને લાંબા સમય સુધી રાખ્યા પછી તેને ગરમ કરીને પીવો છો તો તેનાથી ટેનિન બહાર નીકળી જાય છે, જેના કારણે ચાનો સ્વાદ કડવો થઈ જાય છે. એવામાં ચા તમારા મોંના સ્વાદને પણ બગાડી દેશે.

• ચા ગરમ કરવા સાથે સંલગ્ન જરૂરી વાતો

જો ચા બન્યાને ૧૫ મિનિટનો જ સમય થયો હોય તો તમે તેને ગરમ કરીને પી શકો છો.

ચાને મૂકી રાખ્યાને ૪ કલાક કરતા વધુ સમય થઈ ગયો છે, તો તેને ફરીથી ગરમ કરવાની ભૂલ કયારેય ન કરશો.

ચા બનાવતી વખતે એટલી જ ચા બનાવો જેટલી જરૂર છે, જેથી મૂકી રાખવી ન પડે.