Gujarati News

ઉત્તર પ્રદેશના હાથરાસમાં કથિત ગેંગ રેપ કેસમાં કોંગ્રેસ પક્ષે સતત ન્યાય માટે પોતાનો અવાજ ઉઠાવ્યો છે. આ ક્રમમાં કોંગ્રેસ મહિલાઓ સામેના ગુનાઓ પર કાબૂ મેળવવા અને મહિલાઓની સુરક્ષા માટે કડક પગલા ભરવાની માંગ કરી રહી છે. તે જ સમયે, કેન્દ્ર અને રાજ્ય સરકારોને આ મુદ્દા પર જાગૃત કરવાના આશય સાથે, પાર્ટીએ #SpeakUpforWomenSafety નામના સોશિયલ મીડિયા પર એક અભિયાન પણ શરૂ કર્યું છે.

  કોંગ્રેસનું કહેવું છે કે,' છેલ્લા છ વર્ષમાં મહિલાઓ વિરુદ્ધ વધી રહેલા ગુનાઓએ દરેક દેશવાસીઓને હચમચાવી દીધા છે. દેશમાં મહિલા શક્તિ ભયના વાતાવરણમાં છે, અસલામતી અનુભવે છે. આવી સ્થિતિમાં મહિલાઓ સામે વધી રહેલા ગુના સામે અવાજ ઉઠાવવો જરૂરી છે. કોંગ્રેસના કેટલાક નેતાઓનું કહેવું છે કે, હાથરસમાં પુત્રી પર થયેલા બળાત્કારથી મહિલાઓ વિરુદ્ધ વધી રહેલા ગુનાઓ સામે ભાજપની ગંભીરતાને ઉજાગર કરી છે. ભાજપ સરકાર, પુત્રીને ન્યાય આપવાને બદલે, આરોપીઓની તરફેણમાં ઉભી હોવાનું લાગી રહ્યું છે.' કોંગ્રેસના મતે ભાજપના નેતાઓએ, હાથરસની પુત્રીને દોષી ઠેરવીને બદનામ કરવાનો પ્રયાસ કર્યો. પાર્ટીની લડત, આવી ઘૃણાસ્પદ માનસિકતા સામે છે. પીડિતા સામે પરેશાની બંધ થવી જોઈએ, પીડિતાને ન્યાય મળવો જોઇએ.

સ્પીક અપ ફોર વુમન સેફટી અભિયાન ભાગ રૂપે, કોંગ્રેસના મહાસચિવ પ્રિયંકા ગાંધી વાડ્રાએ પોતાના વીડિયો સંદેશમાં કહ્યું છે કે,' મહિલાઓ વિરુદ્ધ ગુનાઓ સતત વધી રહ્યા છે. આવી સ્થિતિમાં, દલિત મહિલાઓનો અવાજ સાંભળવાને બદલે, તેમને બદનામ કરવા, તેમના પર આક્ષેપ કરીને શરમજનક અને કઠોર કાર્યવાહી કરવામાં આવી રહી છે. પરંતુ દેશની મહિલાઓ હવે ચૂપ નહીં રહે. જો એક બહેનને દોષી ઠેરવવામાં આવે છે, તો લાખો બહેનો અવાજ ઉઠાવશે અને તેમની સાથે ઉભા રહેશે. હવે મહિલાઓએ મહિલા સુરક્ષાની કામગીરી સંભાળવી પડશે.'

તે જ સમયે, મહિલા કોંગ્રેસ અધ્યક્ષ સુષ્મિતા દેવે કહ્યું કે, 'જો દેશના કોઈપણ રાજ્યમાં બળાત્કાર થાય, તો આપણે બધા દુ:ખી થઈએ છીએ. બળાત્કાર જેવા સંવેદનશીલ મુદ્દા પર સરકારે, પોતાની જવાબદારીનું પાલન કરવું જોઈએ. હાથરસના મામલે યુપી સરકારે પીડિતા સાથે જે વર્તન કર્યું છે, તે શરમજનક છે.'

પક્ષના પ્રવક્તા સુપ્રિયા શ્રીનેતે કહ્યું કે,' મહિલાઓ પર વધતા જતા અત્યાચાર અને ગુનાઓએ, આપણા દેશની આત્માને હચમચાવી નાખી છે. તે દેશ અને વિશ્વની અડધી વસ્તીની ઓળખનો પ્રશ્ન છે. તેથી આ અભિયાનમાં જોડાવા માટે આપ સૌનો આભાર.'

સાંસદ શશી થરૂરે જણાવ્યું હતું કે,' યુપીમાં છેલ્લા કેટલાક સમયથી બળાત્કાર અને હત્યા જેવા ગુનાઓ બન્યા છે. પરંતુ હાથરસ માં જે બન્યું તે ન્યાય મેળવવા માંગતા લોકો, અને તેમની સાથે ઉભા રહેલા દરેક વ્યક્તિનું અપમાન જ નથી કરતું, પણ હતાશ પણ કરે છે.'

કોંગ્રેસના પ્રવક્તા જયવીર શેરગિલે કહ્યું કે,' આપણો દેશ વાસ્તવિક અર્થમાં ત્યારે આઝાદ થશે, જ્યારે આપણા દેશની મહિલાઓ નિર્ભયતાથી ઘરની બહાર ચાલી શકે અને રાતના અંધારામાં પણ માથું ઊંચું કરી શકે. પરંતુ ભાજપની મહિલા વિરોધી માનસિકતાને કારણે આજે આપણી દીકરીઓ દિવસના પ્રકાશમાં પણ સુરક્ષિત નથી.'

ઉત્તરાખંડના પૂર્વ મુખ્ય પ્રધાન હરીશ રાવતે કહ્યું હતું કે,' ભારતમાં જે થઈ રહ્યું છે તે દુ:ખદ છે, હ્રદયસ્પર્શી છે. 'બેટી બચાવો' અભિયાન ના ધજાગરા થયા છે. ઘણી રાજ્ય સરકારો વાસ્તવિકતાને છુપાવવા પ્રયાસ કરી રહી છે. મહિલાઓ વિરુદ્ધ વધતા ગુનાઓને લીધે સ્થિતિ ગંભીર બની છે.'

રાગિની નાયકે કહ્યું કે, 'મોદીજીનું સૂત્ર 'બેટી બચાવો' હતું. પરંતુ આજે લોકો કહી રહ્યા છે કે, આ સૂત્ર એક ચેતવણી બની ગયું છે. મોદીજી સત્તા પર આવ્યા, તે તમામ વચનો, આજે ક્યાંક ખોટા સાબિત થઈ રહ્યા છે. તે કેટલું શરમજનક છે.'