Gujarati News

નવી દિલ્હી તા. ૧૧ : દેશની રાજધાનીમાં ગઇકાલ રાતથી જ ભારે વરસાદ પડી રહ્યો છે. દિલ્હીમાં આ વર્ષે મોનસુન કદાચ અંતમાં દસ્તક આપી ગયું હશે, પરંતુ તેણે ૧૮ વર્ષનો રેકોર્ડ તોડી નાખ્યો છે. આ મોનસુનમાં રાજધાની દિલ્હીમાં અત્યાર સુધીમાં ૧૦૦૫.૩ મીમી વરસાદ નોંધાયો છે. ૨૦૧૦ પછી આ પ્રથમ વખત છે જયારે દિલ્હીમાં વરસાદ ચોમાસામાં ૧૦૦૦ મીમીનો આંકડો પાર કરી ગયો છે. અગાઉ ૧ સપ્ટેમ્બરે દિલ્હીમાં ૧૯ વર્ષ બાદ એક દિવસ વધુ વરસાદનો રેકોર્ડ બન્યો હતો.

હવામાન વિભાગના જણાવ્યા અનુસાર દિલ્હી-એનસીઆરમાં શનિવારે પણ હળવાથી ભારે વરસાદની સંભાવના છે. આ માટે હવામાન વિભાગે ઓરેન્જ એલર્ટ જાહેર કર્યું છે. વિભાગ અનુસાર, દિલ્હી, એનસીઆર, હરિયાણા અને યુપીના ઘણા વિસ્તારોમાં વાવાઝોડા સાથે વરસાદ પડી શકે છે.

હવામાન વિભાગના જણાવ્યા અનુસાર ૧ જૂનથી દિલ્હીમાં ચોમાસુ શરૂ થશે. સમગ્ર વરસાદની ઋતુમાં સરેરાશ ૬૪૯.૮ મીમી વરસાદ પડે છે. જો આપણે ૧ જૂનથી ૧૦ સપ્ટેમ્બર સુધી વાત કરીએ, તો સરેરાશ ૫૮૬.૪ મીમી વરસાદ પડે છે. આ વખતે ૧૦ સપ્ટેમ્બરના રોજ આ આંકડો ૧૦૦૫.૩ પર પહોંચી ગયો. અગાઉ ૨૦૦૩ માં અહીં ૧૦૦૫ મીમી વરસાદ નોંધાયો હતો.

૧૩ જુલાઈએ ચોમાસુ દિલ્હીમાં પ્રવેશ્યું  હોવા છતાં, ૧૬ દિવસ સુધી વરસાદ પડ્યો, જે ચાર વર્ષમાં સૌથી વધુ છે. ઓગસ્ટમાં માત્ર ૧૦ દિવસ વરસાદ પડ્યો હતો, જે સાત વર્ષમાં સૌથી ઓછો છે. તે જ સમયે, સપ્ટેમ્બરમાં અત્યાર સુધીમાં ૨૪૮.૯ મીમી વરસાદ નોંધાયો છે, જયારે દિલ્હીમાં સામાન્ય રીતે સપ્ટેમ્બરમાં ૧૨૯.૮ મીમી વરસાદ પડે છે.