Gujarati News

નવી દિલ્હી તા. ૧૦ :ભારતનું ઘરગથ્થુ દેવાનું સ્તર ડિસેમ્બર ૨૦૨૩ સુધીમાં જીડીપીના ૪૦%ના રેકોર્ડ ઉચ્ચ સ્તરે પહોંચી ગયું છે, જયારે ચોખ્ખી નાણાકીય બચત ઘટીને જીડીપીના લગભગ ૫% થઈ ગઈ છે. મોતીલાલ ઓસવાલના રિપોર્ટમાં આ આંકડો સામે આવ્યો છે. રિપોર્ટ અનુસાર આનાથી નાણાકીય તણાવ વધી શકે છે. મીડિયા અહેવાલો અનુસાર, ગયા મહિને જાહેર કરાયેલા અહેવાલમાં દર્શાવવામાં આવ્યું હતું કે ઘરેલું દેવું અથવા દેવાની અંદર, અસુરક્ષિત વ્યકિતગત લોનમાં સૌથી ઝડપી વધારો જોવા મળ્યો છે. આ પછી સુરક્ષિત લોન, કૃષિ લોન અને બિઝનેસ લોન છે. જયારે પરિવારોની ભૌતિક બચત ૨૦૨૨-૨૩માં દસ વર્ષની ઊંચી સપાટીએ પહોંચી હતી, ત્યારે તેમની કુલ બચત જીડીપીના ૧૮.૪%ના છ વર્ષની નીચી સપાટીએ પહોંચી હતી. રિપોર્ટ દર્શાવે છે કે ભારતની ગ્રોસ ડોમેસ્ટિક સેવિંગ્સ  ઘટીને જીડીપીના ૩૦.૨% થઈ ગઈ છે, જે ૨૦૧૩-૧૪ અને ૨૦૧૮-૧૯ વચ્ચે જોવા મળેલી ૩૧-૩૨% રેન્જ કરતા ઓછી છે.

અહેવાલમાં જણાવાયું છે કે ગયા વર્ષના પ્રથમ નવ મહિનામાં પરિવારોની કુલ નાણાકીય બચત ૨૦૨૨-૨૩ના સમાન સમયગાળામાં ૧૦.૫% થી વધીને જીડીપીના ૧૦.૮% થઈ ગઈ છે. જો કે, અહેવાલમાં નોંધ્યું છે કે રાજકોષીય જવાબદારીઓ પણ GDPના ૫.૫% થી ૫.૮% સુધી પ્રમાણસર વધી છે. ૨૦૨૨-૨૩માં પરિવારો દ્વારા વાર્ષિક ઋણ GDPના ૫.૮% સુધી વધશે, જે અત્યાર સુધીનો બીજો સૌથી વધુ આંકડો છે.

રિપોર્ટમાં કહેવામાં આવ્યું છે કે પરિવારો તેમની વપરાશની જરૂરિયાતો પૂરી કરવા માટે મોટા પાયે લોન લઈ રહ્યા છે. આ વલણ પરિવારોની ચોખ્ખી નાણાકીય બચત માટે જોખમ ઊભું કરે છે. આ બચત ઘરની કુલ નાણાકીય બચત અને નાણાકીય જવાબદારીઓ વચ્ચેના સંતુલન પર આધારિત છે. નોંધનીય છે કે રિઝર્વ બેંક ઓફ ઈન્ડિયાના ડેટાએ જણાવ્યું હતું કે પરિવારોની ચોખ્ખી નાણાકીય બચત લગભગ પાંચ દાયકામાં સૌથી નીચા સ્તરે આવી ગઈ છે - નાણાકીય વર્ષ ૨૦૨૩ માં જીડીપીના ૫.૧%, જે નાણાકીય વર્ષ ૨૦૨૨ માં ૭.૨% હતી.