Gujarati News

મુંબઇ તા. ૯ : ગણેશોત્સવને બોલિવુડ સેલેબ્સ ધામધૂમથી ઉજવે છે અને હવે તહેવાર નજીક આવી ગયો છે ત્યારે સેલેબ્સે તૈયારીઓ શરૂ કરી દીધી છે. બોલિવુડ એકટ્રેસ શિલ્પા શેટ્ટી દર વર્ષે પોતાના ઘરે ગણપતિજીની મૂર્તિ લાવે છે. ગણેશોત્સવને આડે હવે ગણતરીના દિવસો રહ્યા છે ત્યારે દર વર્ષની જેમ શિલ્પા શેટ્ટી આ વખતે પણ પોતાના ઘરે ગણપતિજીને લઈ આવી છે. શિલ્પા શેટ્ટીનો પરિવાર હાલ મુશ્કેલ સમયમાંથી પસાર થઈ રહ્યો છે તેમ છતાં તેણે પરંપરા તોડી નથી. શિલ્પા શેટ્ટીનો પતિ રાજ કુંદ્રા અશ્લીલ ફિલ્મો બનાવાના કેસમાં જેલમાં બંધ છે તેમ છતાં શિલ્પાએ ઉલ્લાસથી પોતાના ઘરે વિઘ્નહર્તાનું સ્વાગત કર્યું છે.

૧૦ સપ્ટેમ્બરે ગણેશ ચતુર્થી છે ત્યારે શિલ્પા શેટ્ટી લાલબાગ વર્કશોપમાં ગણેશજીની મૂર્તિ લેવા આવી હતી. શિલ્પા શેટ્ટી સિમ્પલ આઉટફિટમાં પણ સુંદર લાગતી હતી. બાપ્પાને ઘરે લઈ જવા આવેલી શિલ્પાના ચહેરા પર સ્માઈલ હતી અને તેણે ગણપતિજીની મૂર્તિ સાથે ફોટોગ્રાફર્સને પોઝ આપ્યો હતો.

પતિ રાજ કુંદ્રાની ધરપકડના ખાસ્સા દિવસો સુધી કામથી અળગી રહેલી શિલ્પાએ બે અઠવાડિયા પહેલા જ શૂટિંગ ફરી શરૂ કર્યું છે. રિયાલિટી શો 'સુપર ડાન્સર'માં જજ તરીકે જોવા મળતી શિલ્પાનું સેટ પર ટીમે ઉમળકાભેર સ્વાગત કર્યું હતું. જેના કારણે શિલ્પા ભાવુક થઈ હતી. હાલમાં જ કોરિયોગ્રાફર અને ડાયરેકટર ફરાહ ખાન 'સુપર ડાન્સર'ના સેટ પર મહેમાન બનીને આવી હતી ત્યારે શિલ્પાએ તેની સાથે ડાન્સ પણ કર્યો હતો.

પતિની ધરપકડ બાદ શિલ્પાએ લાંબી પોસ્ટ મૂકીને પોતાનો પક્ષ મૂકયો હતો. તેણે લખ્યું હતું, 'છેલ્લા થોડા દિવસો દરેક મોરચે મુશ્કેલ રહ્યા છે. ઘણી અફવાઓ ઉડી છે અને આરોપો લાગ્યા છે. મીડિયા અને મારા શુભચિંતકો (જે ખરેખર શુભચિંતકો નથી) દ્વારા મારા પર બિનજરૂરી દોષારોપણ કરવામાં આવ્યા છે. બહોળા પ્રમાણમાં ટ્રોલિંગ થયું અને સવાલો ઉઠવાયા, જે માત્ર મારા પર નહોતા મારા પરિવાર પર પણ હતા. હવે હું મારો પક્ષ મૂકું છું કે મેં હજી કોઈપણ ટિપ્પણી કરી નથી અને કરીશ પણ નહીં કારણકે આ કેસ હજી ચાલી રહ્યો છે. મહેરબાની કરીને મારા નામે ખોટા નિવેદનો છાપવાનું બંધ કરી દો.'

'સેલિબ્રિટી તરીકેની મારી ફિલોસોફી રહી છે કે, 'કયારેય ફરિયાદ ના કરો અને સ્પષ્ટતા પણ ના કરો' અને હું આને વળગી રહીશ. હું એટલું જ કહેવા માગુ છું કે આ કેસની તપાસ હજી ચાલી રહી છે અને મને મુંબઈ પોલીસ તેમજ ભારતની ન્યાય વ્યવસ્થા પર પૂરતો વિશ્વાસ છે. પરિવાર તરીકે અમે કાયદાકીય ઉપાયોના તમામ  સ્ત્રોતનો ઉપયોગ કરી રહ્યા છીએ. પરંતુ ત્યાં સુધી હું તમને વિનમ્રતાથી વિનંતી કરૃં છું, ખાસ કરીને એક મા તરીકે અપીલ કરૃં છું કે, મારા બાળકોનો વિચાર કરીને અમારી પ્રાઈવસીનું માન જાળવો. અધૂરી માહિતીની પુષ્ટિ કર્યા વિના તેને છાપવાનું ટાળો તેવી વિનંતી છે.' તેમ શિલ્પાએ ઉમેર્યું.