Gujarati News

નવી દિલ્હી તા. ૮ : તહેવારોની સીઝનમાં રેલવે દ્વારા મુસાફરી કરતા લોકો માટે મહત્વના સમાચાર છે. ખરેખર, મુસાફરોની સલામતીને ધ્યાનમાં રાખીને, રેલવે મંત્રાલયે તેની કોવિડ -૧૯ માર્ગદર્શિકા છ મહિના માટે અથવા આગળની સૂચનાઓ સુધી લંબાવી છે. આદેશ અનુસાર, રેલવે પરિસર અને ટ્રેનોમાં માસ્ક ન પહેરવા પર ૫૦૦ રૂપિયા સુધીનો દંડ થઈ શકે છે.

અગાઉ, ૧૭ એપ્રિલ, ૨૦૨૧ ના   રોજ, ભારતીય રેલવે દ્વારા સ્ટેશનો પર લોકો દ્વારા માસ્ક પહેરવા અંગે વિશેષ માર્ગદર્શિકા જારી કરવામાં આવી હતી. રેલવે દ્વારા બહાર પાડવામાં આવેલા નવા નોટિફિકેશનમાં ૧૭ એપ્રિલના રોજ બહાર પાડવામાં આવેલા નોટિફિકેશનનો ઉલ્લેખ કરતા જણાવવામાં આવ્યું છે કે માર્ગદર્શિકા ૧૬ એપ્રિલ, ૨૦૨૨ અથવા આગળની સૂચનાઓ સુધી લંબાવવામાં આવી રહી છે. જૂના નોટિફિકેશનની માન્યતા આ મહિને ૧૬ ઓકટોબરે સમાપ્ત થઈ રહી હતી.

આરોગ્ય મંત્રાલયના સંયુકત સચિવ લવ અગ્રવાલે જણાવ્યું હતું કે છેલ્લા ૨૪ કલાકમાં દેશમાં કોવિડ -૧૯ ના લગભગ ૨૨ હજાર કેસ નોંધાયા છે. આજે પણ, દેશમાં દરરોજ સરેરાશ ૨૦,૦૦૦ કેસ આવી રહ્યા છે. ગયા અઠવાડિયે ૫૬ ટકા કોવિડ કેસ કેરળમાંથી નોંધાયા છે.

અગ્રવાલે કહ્યું કે ૫ રાજયો એવા છે જયાં હજુ ૧૦ હજારથી વધુ સક્રિય કેસ બાકી છે. કેરળમાં લગભગ ૧,૨૨,૦૦૦ સક્રિય કેસ છે. મહારાષ્ટ્રમાં લગભગ ૩૬,૦૦૦ સક્રિય કેસ છે. તમિલનાડુ, મિઝોરમ અને કર્ણાટકમાં પણ ઊંચી સંખ્યામાં સક્રિય કેસ છે.