Gujarati News

નવી દિલ્હી: સરકારે શનિવારે રાજકીય પક્ષોને દાન આપવા માટે ઉપયોગમાં લેવાતા ચૂંટણી બોન્ડનો 24મો હપ્તો જારી કરવાની મંજૂરી આપી છે. 5 ડિસેમ્બરથી તેનું વેચાણ કરવામાં આવશે. આ જ દિવસે ગુજરાતમાં વિધાનસભા ચૂંટણીના બીજા તબક્કાનું પણ મતદાન થશે.
નાણા મંત્રાલયે એક નિવેદનમાં જણાવ્યું હતું કે ચૂંટણી બોન્ડનું વેચાણ 5 ડિસેમ્બરથી શરૂ થશે. આ બોન્ડ સ્ટેટ બેંક ઓફ ઈન્ડિયા (SBI)ની 29 અધિકૃત શાખાઓમાંથી 12 ડિસેમ્બર સુધી ખરીદી શકાય છે. ઈલેક્ટોરલ બોન્ડનો 23મો હપ્તો 9 થી 15 નવેમ્બર દરમિયાન ખોલવામાં આવ્યો હતો.
રાજકીય પક્ષોને દાન આપવા માટે રોકડના વિકલ્પ તરીકે ઇલેક્ટોરલ બોન્ડ જારી કરવાની સિસ્ટમ લાગુ કરવામાં આવી છે. કોઈપણ ભારતીય નાગરિક અથવા ભારતમાં સ્થાપિત કંપની આ બોન્ડ ખરીદી શકે છે. સામાન્ય રીતે ચૂંટણી બોન્ડનું વેચાણ નિર્દિષ્ટ મહિનાની 1લી-10મી વચ્ચે થાય છે.
1-10 માર્ચ 2018 દરમિયાન ઈલેક્ટોરલ બોન્ડ્સનો પ્રથમ હપ્તો વેચવામાં આવ્યો હતો.
લખનવ, શિમલા, દેહરાદૂન, કોલકાતા, ગુવાહાટી, ચેન્નાઈ, પટના, નવી દિલ્હી, ચંદીગઢ, શ્રીનગર, ગાંધીનગર, ભોપાલ, રાયપુર અને મુંબઈ સહિત એસબીઆઈની 29 શાખાઓમાંથી ચૂંટણી બોન્ડ ખરીદી શકાશે.
SBI એકમાત્ર એવી બેંક છે જે ચૂંટણી બોન્ડ જારી કરવા માટે અધિકૃત છે.
ઈલેક્ટોરલ બોન્ડની માન્યતા ઈશ્યુ થયાની તારીખથી 15 દિવસની રહેશે. માન્યતા અવધિની સમાપ્તિ પછી જો બોન્ડ અધિકૃત શાખાઓમાં જમા કરવામાં આવે તો રાજકીય પક્ષો કોઈપણ ચુકવણી મેળવી શકશે નહીં.
ચૂંટણી બોન્ડ ભારતીય નાગરિકો અથવા દેશમાં સમાવિષ્ટ અથવા સ્થાપિત સંસ્થાઓ દ્વારા ખરીદી શકાય છે.
છેલ્લી લોકસભા ચૂંટણી અથવા રાજ્યની વિધાનસભાની ચૂંટણીમાં ઓછામાં ઓછા એક ટકા મત મેળવનાર રજિસ્ટર્ડ પક્ષો ચૂંટણી બોન્ડ દ્વારા દાન મેળવવા માટે પાત્ર છે.
નોંધનીય છે કે ભૂતકાળમાં ચૂંટણી બોન્ડ યોજના 2018માં સુધારો કરતી વખતે કેન્દ્ર સરકારે એવી જોગવાઈ કરી હતી કે રાજ્યો અને કેન્દ્ર શાસિત પ્રદેશોની વિધાનસભાની ચૂંટણીના વર્ષમાં બોન્ડનું વધુ 15 દિવસ વેચાણ થશે. ઘણા રાજ્યોમાં ચૂંટણી પહેલા સરકારના આ પગલા પર પણ સવાલો ઉભા થયા હતા.
પાછળથી એ વાત સામે આવી કે સરકારે આ સુધારો કરવા માટે ભારતના ચૂંટણી પંચનો અભિપ્રાય પણ લીધો ન હતો.