Gujarati News

લખનઉ,તા.૫: ઉત્ત્।ર પ્રદેશના હમીરપુરમાં એક આંતરજ્ઞાતિ લગ્નથી નારાજ માતાએ ફુલહાર દરમિયાન વરરાજા બનેલા પોતાના જ પુત્રને સ્ટેજ પર ચપ્પલોથી ધોઇ નાંખ્યો હતો. લગ્નથી નાખુશ માતાએ ફોટોગ્રાફરને પણ સ્ટેજ પરથી નીચે ધક્કો માર્યો હતો. વરરાજાની માતાના વિરોધ બાદ આખા લગ્ન મંડપમાં ભારે હંગામો ઉભો થયો હતો. અંતે જેમ-તેમ કરી વરરાજાની માતાને મંડપ બહાર લઇ જવાયા ત્યારે લગ્નની વિધિ પૂરી કરવાના ઠેકાણા થયા હતા.

માનવામાં આવી રહ્યું છે કે, હમીરપુરમાં રહેતાં ઉમેશ ચંદ્રએ તેના માતા-પિતાને જણાવ્યા વગર જ પાડોશમાં રહેતી અંકિતા ગૌતમ સાથે કોર્ટ મેરેજ કરી લીધા હતા. જે પછી વરવધૂ સાથે રહેવા લાગ્યા હતા. કોર્ટ મેરેજથી વરરાજાના માતા-પિતા રોષે ભરાયા હતા. બીજી તરફ પુત્રી દ્વારા કોર્ટ મેરેજ કરી લીધા બાદ વધૂના પિતાએ બંને લગ્ન ધામધૂમથી કરવાનો નિર્ણય લીધો હતો. શનિવાર રાત્રે થનારા આ લગ્નમાં પુત્રીના પિતાએ વરરાજાના માતા-પિતા સિવાય તેમના અન્ય મહેમાનોને કંકોત્રી આપી હતી.

વરરાજાના માતા-પિતા આ લગ્નની વિરોધમાં હતા અને જયારે લગ્ન વિધિ દરમિયાન ફુલહાર થવા લાગ્યો ત્યારે જ વરરાજાની માતા મો પર કપડુ બાંધીને અચાનક સ્ટેજ પર આવી ચડી હતી અને ફોટોગ્રાફરને ધક્કો મારતાં વરરાજાને ચપ્પલે ને ચપ્પલે ધોઇ નાંખ્યો હતો. વરરાજા પણ પોતાના બચાવમાં વધૂ પાછળ સંતાઇ ગયો હતો.

આ દરમિયાન અન્ય લોકોએ વરરાજાની માતાને પકડીને મંડપ બહાર કરી હતી. પરંતુ વરરાજાની માતા ગાળો બોલતાં બોલતાં ત્યાંથી ચાલી આવી હતી. આ ઘટનાથી લગ્નની બાકીની વિધિ હળભળાટમાં પુરી કરવામાં આવી હતી. જે પછી વધૂના પિતાએ પુત્રીની વિદાઇ કરી હતી. વર્તમાન સમયમાં વરરાજા ઘરથી અલગ રહે છે અને ત્યાંથી જ જાન લઇને પરણવા આવ્યો હતો.