Gujarati News

મુંબઇ,તા.૪: ફિલ્મ જગતમાં પોતાના અભિનયના દમ પર ઓળખ ઉભી કરનારા અભિનેતા વિજય રાઝની સાથી મહિલા કલાકાર સાથે છેડતી કરવાના આરોપમાં પોલીસે ધરપકડ કરી લીધી છે. પોલીસે મહારાષ્ટ્રના ગોંદિયામાં સ્થિત એક હોટલમાંથી એકટરની ધરપકડ કરી હતી.

પોલીસ ફરિયાદ મુજબ આરોપ હતા કે, વિજય રાઝ તેમની ટીમ સાથે બાલાઘાટમાં પોતાની આવનારી ફિલ્મ શેરનીનું શૂટિંગ કરી રહ્યા હતા. જે દરમિયાન વિજય રાજે સાથી મહિલા કલાકારની છેડતી કરી હતી. 

૫૭ વર્ષના અભિનેતા વિજય રાઝ ફિલ્મ રનમાં પોતાના કૌઆ બિરિયાની વાળા સીનથી પ્રખ્યાત થયા હતા. આ સિવાય તેમણે ઘણી સુપરહિટ ફિલ્મોમાં યાદગાર અભિનય આપી પોતાનો ચાહક વર્ગ ઉભો કર્યો છે. આ ફિલ્મોમાં ધમાલ, વેલકમ, દીવાને હુએ પાગલ, રઘુ રોમિયો અને ગલી બોય જેવી ફિલ્મો સામેલ છે.

વિજય રાઝે ૧૯૯૯માં બોલીવૂડ ફિલ્મ ભોપાલ એકસપ્રેસથી પોતાની ફિલ્મી કારકિર્દીની શરુઆત કરી હતી.