Gujarati News

નવી દિલ્‍હી, તા.૧: સરકારી તેલ કંપનીઓએ આજે   સવારે કોમર્શિયલ ગેસ સિલિન્‍ડરના ભાવમાં મોટો ફેરફાર કર્યો છે. ૧૯ કિલોનું સિલિન્‍ડર હવે ૧૩૬ રૂપિયા સસ્‍તું થશે. જોકે, કંપનીઓએ સ્‍થાનિક એલપીજીના ભાવમાં કોઈ ફેરફાર કર્યો નથી અને તે ૧૯ મેના રોજ જાહેર કરાયેલા દરે વેચવામાં આવશે.

સરકારી પેટ્રોલિયમ કંપનીઓએ સવારે એલપીજી સિલિન્‍ડરના નવા દરો જાહેર કર્યા છે. કંપનીઓએ ગ્રાહકો પર કોઈ બોજ નથી નાખ્‍યો, પરંતુ કોમર્શિયલ ગેસ સિલિન્‍ડરની કિંમત ૧૩૫ રૂપિયા સસ્‍તી કરી દીધી છે.

પેટ્રોલિયમ કંપની ઇન્‍ડિયન ઓઇલે પોતાના LPG સિલિન્‍ડરના દરમાં આ ઘટાડો કર્યો છે. હવે ઈન્‍ડેન ગેસનું કોમર્શિયલ એલપીજી સિલિન્‍ડર ૧૩૫ રૂપિયા સસ્‍તું થશે. જોકે, ૧૪.૨ કિલોના ઘરેલુ એલપીજી સિલિન્‍ડરની કિંમતોમાં કોઈ ફેરફાર કરવામાં આવ્‍યો નથી. ઘરેલું સિલિન્‍ડર હાલમાં ૧૯ મેના રોજ જારી કરાયેલા દરે વેચાઈ રહ્યું છે.

આજે ૧ જૂનથી કોમર્શિયલ સિલિન્‍ડરના નવા દર જાહેર કરવામાં આવ્‍યા છે. હવે ૧૯ કિલોના કોમર્શિયલ સિલિન્‍ડર પર ૧૩૫ રૂપિયાની રાહત મળશે અને તેનો નવો દર દિલ્‍હીમાં ૨,૨૧૯ રૂપિયા હશે, જે પહેલા ૨,૩૫૫ રૂપિયા હતો. એ જ રીતે કોલકાતામાં કોમર્શિયલ સિલિન્‍ડર ૨,૪૫૪ રૂપિયાને બદલે ૨,૩૨૨ રૂપિયામાં મળશે. મુંબઈમાં પણ તેની કિંમત ૨,૩૦૬ રૂપિયાથી ઘટીને ૨,૧૭૧.૫૦ રૂપિયા થઈ ગઈ છે, જયારે ચેન્નાઈમાં એલપીજી સિલિન્‍ડર હવે ૨,૫૦૮ રૂપિયાને બદલે ૨,૩૭૩ રૂપિયામાં વેચવામાં આવશે.

છેલ્લા બે મહિનામાં કોમર્શિયલ એલપીજી સિલિન્‍ડરના ભાવમાં અનેકગણો વધારો થયો છે. માર્ચમાં દિલ્‍હીમાં ૧૯ કિલોનો સિલિન્‍ડર માત્ર ૨,૦૧૨ રૂપિયામાં વેચાઈ રહ્યો હતો. ૧ એપ્રિલે તેની કિંમત વધારીને ૨,૨૫૩ રૂપિયા કરવામાં આવી હતી, ત્‍યારબાદ ૧ મેના રોજ પણ તેની કિંમતોમાં ૧૦૨ રૂપિયાનો વધારો થયો હતો, ત્‍યારબાદ કોમર્શિયલ સિલિન્‍ડરની કિંમત વધીને ૨,૩૫૪ રૂપિયા થઈ ગઈ હતી.

પેટ્રોલિયમ કંપનીઓએ આજે   ઘરેલુ એલપીજી સિલિન્‍ડરના દરમાં કોઈ ફેરફાર કર્યો નથી, પરંતુ મે મહિનામાં જ તેની કિંમતો બે વખત વધી ગઈ છે. પહેલા ૭ મેના રોજ કંપનીઓએ ૧૪.૨ કિલોના સિલિન્‍ડર પર ૫૦ રૂપિયા વધાર્યા હતા અને પછી ૧૯ મેના રોજ ૩.૫૦ રૂપિયાનો વધારો કર્યો હતો, ત્‍યારબાદ દિલ્‍હી-મુંબઈમાં ઘરેલુ સિલિન્‍ડરની કિંમતો એક હજાર રૂપિયાની ઉપર પહોંચી ગઈ હતી. ૭ મેના રોજ કોમર્શિયલ ગેસ સિલિન્‍ડર ૧૦ રૂપિયા સસ્‍તું થયું હતું જયારે ૧૯ મેના રોજ તેની કિંમતમાં ૮ રૂપિયાનો વધારો કરવામાં આવ્‍યો હતો.

સરકારી પેટ્રોલિયમ કંપનીઓએ આજે   રાજધાની દિલ્‍હીમાં કોમર્શિયલ એલપીજી સિલિન્‍ડરની કિંમતોમાં સૌથી મોટો ઘટાડો કર્યો છે. અહીં આજે ૧૯ કિલોનો ન્‍ભ્‍ઞ્‍ સિલિન્‍ડર ૧૩૬ રૂપિયા સસ્‍તો થયો છે, જયારે કોલકાતામાં તેની કિંમતોમાં ૧૩૩ રૂપિયાનો ઘટાડો થયો છે. આ સિવાય મુંબઈમાં ૧૩૫.૫૦ રૂપિયા પ્રતિ સિલિન્‍ડરનો ઘટાડો થયો છે, જયારે ચેન્નાઈમાં કોમર્શિયલ સિલિન્‍ડરની કિંમતમાં આજે ૧૩૫ રૂપિયાનો ઘટાડો થયો છે.