Gujarati News

મોડાસા:તાલુકાના રાજલી ગામે સરકારી કાર્યક્રમ હેઠળ રસીકરણ હાથ ધરાયું હતું.પરંતુ ગ્રામજનોને રસી આપવાના આ સ્થળે ગામનો જ એક શખ્સ દારૂ પી ને આવી ચડતાં અને બેફામ  ગાળો બોલી,રસીકરણ કેન્દ્રની ખુરશી તોડી તરખાટ મચાવતાં રસી મૂકાવવા આવેલા ગ્રામજનો ફફડી ઉઠયા હતા.

જયારે ફરજ પરના આરોગ્ય મહિલા કર્મીએ આ અંગે આરોગ્ય વિભાગને જાણ કરતા મેડિકલ ઓફીસર દ્વારા ૩ વાર પોલીસને જાણ કરી સ્થળ ઉપર બોલાવવા છતાં કોઈ જ પોલીસકર્મી સ્થળ પર નહી ફરકતા ફરી એકવાર જિલ્લામાં દારૂડીયા,બુટલેગર અને પોલીસની દોસ્તી જગજાહેર બની હતી. જયારે આ પ્રકરણે જવાબદારો સામે પગલા ભરવા માંગ ઉઠી છે. આ ઘટનામાં દારૂડીયાની ધમાલનો વીડીયો ધૂમ વાયરલ થયો હતો.

મોડાસા તાલુકાના રાજલી ગામે જિલ્લા આરોગ્ય વિભાગ દ્વારા રસીકરણ કાર્યક્રમ  યોજાયો હતો. આ કાર્યક્રમમાં ગ્રામજનો ઉત્સાહભેર જોડાયા હતા અને રસી મેળવી રહયા હતા. પરંતુ આ રસીકરણ દરમ્યાન જ ગામનો એક શખ્શ દારૂ ઢેંચી છાટકો બની આ રસીકરણ કેન્દ્રમાં બેખોફ થઈ પ્રવેશ્યો હતો અને ફરજ પરના આરોગ્ય કર્મીઓને ધામ ધમકી આપી,ડરાવી આ દારૂડીયાએ તરખાટ મચાવ્યો હતો.ગાળો બોલી રહેલા શખ્સે  કેન્દ્રની ખુરશી તોડી નાખી નુકશાન પહોંચાડયું હતું.અને આ દારૂડીયાની બીકે રસી મૂકાવવા આવેલા ગ્રામજનો ભાગી ગયા હતા.

આ દારૂડીયાના તરખાટથી ફફડાટ અનુભવી રહેલ ફરજ પરના મહિલા કર્મીએ મેડીકલ ઓફિસરને જાણ કરતાં આ અધિકારીએ નજીક ના પોલીસ સ્ટેશને વારંવાર જાણ કરવા છતાં ઘટના બાદ પણ કોઈ પોલીસ કર્મી સ્થળ ઉપર ફરકયો જ ન હતો. મેડિકલ ઓફિસરના જણાવ્યા મુજબ ૩ વાર પોલીસને ફોન કરી જાણ કરવા છતાં કોઈ જ સુરક્ષા કર્મી ઘટના સ્થળે નહી આવતાં પોલીસની કામગીરી સામે જ પ્રશ્નો ઉઠયા છે.