Gujarati News

અમદાવાદ : ગુજરાત વિધાનસભાની ચૂંટણીમાં ભાજપે ૧૫૬ બેઠક જીતીને ઈતિહાસ સર્જી દીધો છે. આ ઉપરાંત ભાજપે ૫૦ ટકાથી વધુ વોટ શેર મેળવ્યો હોય તેવું પણ પ્રથમવાર બન્યું છે. અલબત્ત, આ વખતે ૩૭ બેઠક એવી છે જ્યાં ભાજપે ૨૦૧૭ની સરખામણીએ ઓછા મત મેળવ્યા છે. આ ૩૭ બેઠકોમાંથી ૨૩માં ભાજપનો, ૯માં કોગ્રેસનો, બેમાં આપનો જ્યારે એનસીપી-અપક્ષનો વિજય થયો છે.

૨૦૧૭ કરતાં ઓછા મત મળ્યા હોય તેવી ૩૭ બેઠકોમાંથી ભાજપનો ૨૩માં, કોંગ્રેસનો ૯માં વિજય થયો છે. ભાજપને આ ૩૭માંથી જે ૧૪ બેઠકમાં પરાજય થયો છે તેમાં ધાનેરા, બાયડ, ખેડબ્રહ્મા, વાવ, લુણાવાડા, ખંભાત, કાંકરેજ, દાણીલીમડા, બોટાદ, કુતિયાણા, સોમનાથ, જમાલપુર-ખાડિયા, જામજોધપુર, વિજાપુરનો સમાવેશ થાય છે.

અલબત્ત, ૨૦૧૭ની સરખામણીએ ભાજપે આ ૩૭ બેઠકોમાં કુલ માત્ર ૨૫૨૧ મત ગુમાવ્યા છે. આ ૩૭ બેઠકોમાંથી ૧૯ બેઠક એવી છે જ્યાં આમ આદમી પાર્ટીએ ડિપોઝીટ ગુમાવી છે. બીજી તરફ ૧૧ બેઠકોમાં ભાજપનો ૧૦ હજાર કરતાં વધુ મતથી પરાજય થયો છે. ધારી બેઠકની જ વાત કરવામાં આવે તો ભાજપનો ૨૫૦૬૪ મતથી પરાજય થયો હતો અને જ્યારે આપના ઉમેદવારે ૩૭૭૪૯ મત સાથે જીત મેળવી હતી. કોંગ્રેસના ઉમેદવારને કુલ ૪૮૬૬૬ મતથી પરાજયનો સામનો કરવો પડયો હતો.