Gujarati News

રાજ્યમાં દારૃબંધી છે પરંતુ બુટલેગરો એનકેન પ્રકારે દારૃ ઘુસાડવા માટે નવા નવા કીમિયા અજમાવી રહ્યા છે ખાસ કરીને ચિલોડા હીંમતનગર હાઇવે ઉપર વિદેશી દારૃ ભરેલા વાહનો પોલીસ દ્વારા પકડવામાં આવતા હવે આ માર્ગ ઉપર લક્ઝરી કે એસટી બસમાં મુસાફરોના મારફતે વિદેશી દારૃની હેરાફેરી કરવામાં આવી રહી છે.અવાર નવાર  લક્ઝરી કે બસમાંથી મુસાફરો દારૃ સાથે પકડાયા છે. ત્યારે  ચિલોડા પોલીસની ટીમ ચંદ્રાલા ગામ પાસે વાહન ચેકિંગ કરી રહી હતી તે દરમિયાન રાજસ્થાનથી અમદાવાદ જતી લક્ઝરી બસને ઉભી રાખી હતી. જેમાં તપાસ કરતા એક મુસાફરના થેલામાંથી વિદેશી દારૃના ૯૬  જેટલા ટેટ્રા પેક મળી આવ્યા હતા. જેથી પોલીસે આ મુસાફર અમદાવાદના વાસણા ખાતે ખોડિયાર નગરમાં રહેતા મૂળ રાજસ્થાનના જીતુ ચંપકભાઈ ગોહિલ સામે પ્રોહીબીશન એક્ટ મુજબ ગુનો દાખલ કરી આઠ હજાર ઉપરાંતનો મુદ્દામાલ કબજે કર્યો હતો.