Gujarati News

વડોદરા કોર્પોરેશન દ્વારા સયાજીપુરામાં બનાવેલ રાત્રી બજાર હજુ શરૂ થઈ શક્યું નથી. આ રાત્રી બજારમાં 35 દુકાનો છે. દરેક દુકાન ચોવીસ ચોરસ મીટરનો વિસ્તાર ધરાવે છે. આ દુકાનો જાહેર હરાજીથી ફાળવવા માટે અત્યાર સુધીમાં સાતથી આઠ વખત પ્રયાસ કરવામાં આવ્યો છે, પરંતુ આ દુકાનો લેવા માટે કોઈ એ રસ દાખવ્યો નથી . ત્યારે ફરી એકવાર ભાડામાં ઘટાડો કરીને દુકાનો ફાળવવા દરખાસ્ત રજૂ કરવામાં આવી છે. રાત્રી બજાર બનાવ્યા બાદ પ્રથમવાર જાહેર હરાજીથી આ દુકાનો ફાળવવા માટે મીનીમમ અપસેટ વેલ્યુ 6 લાખ અને ડિપોઝિટની ૨કમ પણ રૂપિયા 6 લાખ નક્કી કરાઈ હતી , પરંતુ એક પણ અરજી આવી ન હતી . જેથી તેમાં ભાવ ઘટાડો કરીને મીનીમમ વેલ્યુ અને ડિપોઝિટની રકમ રૂા 3.11 લાખ કરીને ફરી ત્રણ વખત જાહેરાત આપી અરજીઓ મંગાવી હતી , પરંતુ કોઈ એ રસ દર્શાવ્યો નહતો આમ , સાતથી આઠ વખત પ્રયાસ કરવા છતાં દુકાનો લેવા કોઈ આવ્યું ન હતુ .

ચાર વર્ષથી રાત્રી બજારની આ દુકાનો ખાલી પડી રહી છે . જેના કારણે કોર્પોરેશનને ભાડાની આવક ગુમાવવી પડે છે , એટલું જ નહીં સ્ટ્રીટ લાઇટ વીજબિલ તથા સિકયુરિટી ગાર્ડનો ખર્ચ ભોગવવો પડે છે . રાત્રી બજારની તમામ દુકાનો બને તેમ જલ્દી ફાળવીને આવક ઊભી કરી શકાય તે માટે મીનીમમ અપસેટ વેલ્યુ અને ડિપોઝિટની રકમમાં ફરી ઘટાડો કરી જો એક દુકાન નું માસિક ભાડું રૂા . 12000 નક્કી કરવામાં આવે તો વાર્ષિક ભાડું 1.44 લાખ જેટલું થાય છે , પરંતુ રાત્રી બજારમાં આપવામાં આવેલી વિવિધ સગવડો જોતાં વાર્ષિક ભાડા માટે મીનીમમ અને ડિપોઝિટની રકમ દોઢ લાખ રાખવા વિચારણા કરવા સ્ટેન્ડિંગ સમિતિમાં દરખાસ્ત રજૂ કરવામાં આવી છે.