Gujarati News

અમદાવાદ, તા.૪ : શહેરના નિકોલ વિસ્તારમાંથી વ્યાજખોરોનો ત્રાસ સામે આવ્યો છે. એક યુવકે ૫.૫૦ લાખ ઉછીના લીધા હતા. ૧૦ ટકાના ઊંચા વ્યાજે યુવકે આ રુપિયા લીધા હતા. જેથી યુવક મહિને રુપિયા ૫૫ હજાર જેટલું વ્યાજ ભરતો હતો. તેમ છતા વ્યાજખોરો દ્વારા તેને હેરાન પરેશાન કરવામાં આવતો હતો અને વધુ વ્યાજની માંગણી કરવામાં આવતી હતી. વ્યાજની પઠાણી ઊઘરાણી કરતા વ્યાજખોરોએ યુવકના બાઈકને કારથી ટક્કર મારીને જમીન પર પાડી દીધો હતો. બાદમાં યુવક પર તલવારથી હુમલો કર્યો હતો. આ મામલે યુવકે નિકોલ પોલીસ સ્ટેશનમાં ફરિયાદ નોંધાવતા પોલીસે હત્યાના પ્રયાસ સહિતનો ગુનો નોંધીને આગળની કાર્યવાહી હાથ ધરી છે.

મળતી વિગતો મુજબ, મૂળ મહેસાણાના રાજુભાઈ રબારી હાલ નિકોલમાં રહે છે. તેઓ પશુપાલનનો વ્યવસાય કરે છે. રાજુભાઈ રબારીએ પાંચ વર્ષ પહેલાં ગાયો અને ભેંસો ખરીદવા માટે સંજય રબારી પાસેથી ૧૦ ટકાના વ્યાજે રુપિયા ૫.૫૦ લાખ લીધા હતા. રાજુભાઈ આ રકમ માટે દર મહિને રુપિયા ૫૫ હજારનું વ્યાજ ચૂકવતા હતા. દોઢેક વર્ષ પહેલાં સંજય રબારીએ રાજુભાઈ પાસે પૈસાની માંગણી કરી હતી. એ સમયે સગવડ ન હોવાથી રાજુભાઈએ સગવડ થશે ત્યારે રુપિયા આપવાની વાત કરી હતી. એ પછી સંજય રબારી અને તેના માણસો રાજુભાઈની આઠ ભેંસો લઈ ગયા હતા. એ પછી સંજયનો મિત્ર અમિત રાજુભાઈને ઘરે આવ્યો હતો અને વ્યાજની ઊઘરાણી કરવા લાગ્યો હતો. રાજુભાઈ પાસે પૈસાની સગવડ ન હોવાથી પછી વ્યાજની રકમ ચૂકવશે એવું કહ્યું હતું. ત્યારે સંજયે રાજુભાઈને જાનથી મારી નાખવાની ધમકી આપી હતી. આ દરમિયાન ગુરુવારે ઢોર પકડવાની ગાડી નિકોલ તરફ જઈ રહી હતી.

ત્યારે રાજુભાઈ બાઈક પર અશ્વમેઘ સોસાયટી થઈ સોમનાથ ચોક તરફ જઈ રહ્યા હતા. ત્યારે કારમાં સંજય, જીવા અને અમિત સહિત પાંચ અજાણ્યા શખસો આવ્યા હતા. તેઓએ રાજુભાઈની બાઈકને ટક્કર મારી જમીન પર પાડી દીધા હતા. એ પછી પાંચે વ્યાજખોરોએ રાજુભાઈને તલવારના ત્રણ ઘા માર્યા હતા. જેથી તેઓ લોહીલુહાણ થઈ ગયા હતા. તેમ છતાય વ્યાજખોરો લાકડીઓથી તેમને માર મારતા રહ્યા હતા. આ ઘટના જોઈ આસપાસના લોકો એકત્ર થઈ જતા વ્યાજખોરો ભાગી ગયા હતા. બાદમાં રાજુભાઈને પ્રાથમિક સારવાર માટે હોસ્પિટલમાં ખસેડવામાં આવ્યા હતા. રાજુભાઈ રબારીએ આ મામલે નિકોલ પોલીસ સ્ટેશનમાં ફરિયાદ નોંધાવતા પોલીસે ગુનો નોંધીને તપાસ હાથ ધરી છે.