Gujarati News

વડોદરા, તા.૪ : ૭૨ વર્ષીય વીમા એજન્ટ હરીશ ચૌહાણ (નામ બદલેલ છે) જ્યારે પોર્ન વેબસાઇટ સર્ફ કરી રહ્યા હતા ત્યારે તેમના ફોન પર એક પોપ-અપ મેસેજ દેખાયો, જે વાંચીને તેઓ ચોંકી ઉઠ્યા હતા. તેમાં લખ્યું હતું કે પોર્ન વેબસાઇટ્સ સર્ફિંગ ગેરકાયદેસર છે અને તમારી વિગતો કેન્દ્રીય ગૃહ મંત્રાલય દ્વારા નોંધવામાં આવી છે. દંડ ન થાય અને તમારી વિગતો જાહેર ન થાય તે માટે ચોક્કસ રકમ ચૂકવવાનું પણ કહેવામાં આવ્યું હતું. જેથી ગભરાયેલા ચૌહાણે થોડા અઠવાડિયા પહેલા શહેરના સાયબર નિષ્ણાત મયુર ભુસાવલકરનો સંપર્ક કર્યો હતો. આ અંગે માહિતી આપતા ભુસાવલકરે કહ્યું કે તેમને લાગ્યું કે હેકર્સે તેમના કોન્ટેક્ટ લિસ્ટનો ઍક્સેસ મળી ગયો છે અને હવે તેની સર્ફિંગ વિગતો મિત્રો અને સંબંધીઓમાં ફરતી કરવામાં આવશે. ચૌહાણે ભુસાવલકરને તેનો ફોન ક્લીન કરવામાં મદદ કરવા અને હેકર્સને ટ્રેક કરવાનો પ્રયાસ કરવા કહ્યું.

એથિકલ હેકર્સ અને સાયબર નિષ્ણાતો પોર્ન જોવાના વ્યસની અને તેના કારણે આવા હેકર્સની જાળમાં ફસાયેલા લોકોની મુલાકાતોથી ભારે બીઝી છે. જોકે, સામાજીક શરમના ડરથી તેઓ પોલીસનો સંપર્ક કરવાનું ટાળે છે. નિષ્ણાતો કહે છે કે તેમને છેલ્લા કેટલાક મહિનામાં વડોદરા, અમદાવાદ અને સુરતમાંથી ઓછામાં ઓછા ૧૫ લોકોની વિનંતીઓ મળી છે જેમાં આવી વેબસાઈટ જોતા લોકો સાથે આર્થિક છેતરપિંડી કરવામાં આવી હોય છે અથવા બ્લેકમેલ કરવામાં આવ્યા હોય છે.

જ્યારે મેં ચૌહાણને પોલીસનો સંપર્ક કરવા કહ્યું, જો તેઓ આ ગેંગને પકડવા માંગતા હોય તો, ત્યારે તેમણે સ્પષ્ટ ના પાડી દીધી. તેમના માટે પોલીસ સમક્ષ પોતે પોર્ન જોતા હોવાનું કબૂલ કરવું ખૂબ જ શરમજનક હતું કે તેમણે પોર્ન વેબસાઇટ્સ સર્ફ કરી હતી

અને પોલીસ ફરિયાદ દાખલ કરવાનો અર્થ એ થશે કે તેમના પરિવારને પણ આ વિશે જાણ થશે. હકીકતમાં, મોટાભાગના પીડિતો પોલીસ ફરિયાદ નોંધાવવા માંગતા નથી. તેમ ભુસાવલકરે જણાવ્યું હતું. અમદાવાદ સ્થિત સાયબર નિષ્ણાત સાગર જોશી કે જેઓ રેલવે પોલીસને સાયબર ફ્રોડ અને સાયબર ક્રાઈમ મામલે મદદ કરે છે. તેમણે વધુમાં આગળ જણાવ્યું કે 'આવા કેસોની સંખ્યામાં વધારો થયો છે કારણ કે ઘણા લોકો તેમની પ્રતિષ્ઠા બચાવવા અને તેમના ફોનનો ડેટા ગુનેગારો પાસેથી છોડાવવા માટે રુપિયા ચૂકવે છે. કેટલાક કિસ્સાઓમાં આવી ટોળકી પીડિતાને એમ કહીને ધમકી પણ આપે છે કે તેમની પાસે તેના લાઇવ લોકેશનનો ઍક્સેસ પણ છે. ભુસાવલકરે કહ્યું કે, મેં ટ્રેક કરેલા કેટલાક આઈપી એડ્રેસ મને ઝારખંડ અને મલેશિયા તરફ લઈ ગયા. સાયબર ક્રાઈમ પોલીસના એક અધિકારીએ જણાવ્યું હતું કે, પોર્ન વેબસાઈટ જોવાની ગેરકાયદેસરતા દર્શાવીને લોકોને બ્લેકમેલ કરવાના કિસ્સાઓ વધી રહ્યા છે. છેતરપિંડી કરનારાઓ એવી વેબસાઇટ્સ બનાવે છે જે અધિકૃત સરકારી સાઇટ્સ જેવી જ હોય છે અને તેઓ જે ભાષાનો ઉપયોગ કરે છે તે પણ એટલી ખાતરીદાયક હોય છે કે મોટાભાગે સરકારી જ લાગે અને તેના કારણે ભોગ બનેલા લોકો રુપિયા ચૂકવીને બચી જવા માગે છે. જોકે ઘણીવાર આવા ગુનેગારો સતત વધુ માગણી કરતા રહે છે.