જાપાનમાં આગામી 19 સપ્ટેમ્બરથી એશિયન ગેમ્સ 2026નો ભવ્ય પ્રારંભ થવા જઈ રહ્યો છે. આ મેગા ઈવેન્ટમાં રમાનારી ટી20 ક્રિકેટ ટૂર્નામેન્ટ માટે ભારતીય ક્રિકેટ કંટ્રોલ બોર્ડ (BCCI) દ્વારા 30 સંભવિત ખેલાડીઓની યાદી તૈયાર કરી લેવામાં આવી છે. રમતગમત પત્રકાર હેમંત રસ્તોગીના અહેવાલ મુજબ, આ લિસ્ટમાં સૌથી મોટો આંચકો સૂર્યકુમાર યાદવને લાગ્યો છે. તેને આ સ્ક્વોડમાંથી બહાર રાખવામાં આવ્યો છે, જેનો સ્પષ્ટ અર્થ છે કે તે આ વર્ષે એશિયાર્ડ 2026માં ટીમ ઈન્ડિયાનો કેપ્ટન નહીં હોય. બીજી તરફ, આઈપીએલ 2026 ના યંગ સેન્સેશન વૈભવ સૂર્યવંશીને આ લિસ્ટમાં સ્થાન મળ્યું છે.

ભારતીય મેન્સ ક્રિકેટ ટીમ એશિયન ગેમ્સની વર્તમાન ડિફેન્ડિંગ ચેમ્પિયન છે. છેલ્લે ચીનમાં યોજાયેલી સ્પર્ધામાં ભારતે ઋતુરાજ ગાયકવાડની કેપ્ટનશીપ હેઠળ ગોલ્ડ મેડલ જીત્યો હતો. આ વખતે બોર્ડે તે સુવર્ણચંદ્રક વિજેતા ટીમના 9 સભ્યોને જાળવી રાખ્યા છે. આ સિવાય ઋષભ પંત, શ્રેયસ અય્યર અને યશસ્વી જયસ્વાલ જેવા સ્ટાર પ્લેયર્સને પણ તક આપવામાં આવી છે.

ઈશાન કિશન, ઋતુરાજ ગાયકવાડ, વૈભવ સૂર્યવંશી, શ્રેયસ અય્યર, ઋષભ પંત, વરુણ ચક્રવર્તી, અર્શદીપ સિંહ, હાર્દિક પંડ્યા, અનુકૂળ રોય, અક્ષર પટેલ, રિંકુ સિંહ, જસપ્રિત બુમરાહ, હર્ષ દુબે, ધ્રુવ જુરેલ, તિલક વર્મા, રવિ બિશ્નોઈ, કુલદીપ યાદવ, શાહબાઝ અહમદ, શિવમ દુબે, વિપ્રજ નિગમ, વોશિંગ્ટન સુંદર, યશસ્વી જયસ્વાલ, યશ ઠાકુર, સંજુ સેમસન, નીતીશ રેડ્ડી, પ્રસિદ્ધ ક્રિષ્ના, ખલીલ અહમદ, હર્ષિત રાણા, આયુષ બદોની અને અભિષેક શર્મા.

સૂર્યકુમાર યાદવ ટીમમાં ન હોવાથી કેપ્ટન તરીકે શ્રેયસ અય્યર, સંજુ સેમસન અને ઋતુરાજ ગાયકવાડના નામ સૌથી આગળ ચાલી રહ્યા છે, પરંતુ આખરી નિર્ણય સેલેક્ટર્સ કરશે. આ લિસ્ટમાં સૌથી આકર્ષક નામ વૈભવ સૂર્યવંશીનું છે, જેણે આઈપીએલ 2026 [IPL 2026] માં પોતાના બેટિંગ પ્રદર્શનથી સનસનાટી મચાવી દીધી હતી. રસપ્રદ વાત એ છે કે, એશિયન ગેમ્સ પહેલા જ વૈભવ સિનિયર ટીમ ઈન્ડિયા સાથે આયર્લેન્ડ, ઈંગ્લેન્ડ, ઝિમ્બાબ્વે અને શ્રીલંકાના પ્રવાસે ડેબ્યુ કરતો જોવા મળી શકે છે.

આ ટુર્નામેન્ટમાં માત્ર કેપ્ટન જ નહીં, પરંતુ મુખ્ય કોચ પણ બદલાશે. એશિયન ગેમ્સમાં ગૌતમ ગંભીરની જગ્યાએ વીવીએસ લક્ષ્મણ હેડ કોચની ભૂમિકા ભજવશે. આ ફેરફાર ભારતીય ટીમના બિઝી શિડ્યુલના કારણે થયો છે. જાપાનમાં મેન્સ ક્રિકેટ 24 સપ્ટેમ્બરથી 3 ઓક્ટોબર દરમિયાન રમાશે, જ્યારે તે જ સમયે 7 સપ્ટેમ્બરથી 6 ઓક્ટોબર વચ્ચે ભારતે ઘરઆંગણે વેસ્ટ ઈન્ડિઝ સામે 3 વનડે મેચ રમવાની છે. આથી ગંભીર ભારતની સિનિયર ટીમ સાથે રહેશે અને લક્ષ્મણ એશિયન ગેમ્સ માટે જાપાન જશે.