મુલ્લાનપુર/મોહાલી: આઈપીએલ 2026માં અત્યારે પંજાબ કિંગ્સ (PBKS) ની એવી આંધી ચાલી રહી છે જેની સામે મોટા-મોટા સ્કોર પણ પાંદડાની જેમ ઉડી રહ્યા છે. મુલ્લાનપુરના મેદાન પર રમાયેલી હાઈ-વોલ્ટેજ મેચમાં પંજાબે સનરાઇઝર્સ હૈદરાબાદ (SRH) ને શરમજનક હાર આપીને ટૂર્નામેન્ટમાં સતત ત્રીજી જીત મેળવી છે. હૈદરાબાદે આપેલા 220 રનના વિશાળ લક્ષ્યાંકને પંજાબે માત્ર 18.5 ઓવરમાં જ પાર પાડીને સાબિત કરી દીધું કે આ વખતે તેઓ ચેમ્પિયન બનવાના પ્રબળ દાવેદાર છે.
હૈદરાબાદની તોફાની શરૂઆત પણ અંત નબળો
ટોસ જીતીને પ્રથમ બેટિંગ કરવા ઉતરેલી સનરાઇઝર્સ હૈદરાબાદની શરૂઆત કોઈ સપના જેવી રહી હતી. અભિષેક શર્મા (74 રન) અને ટ્રેવિસ હેડની જોડીએ પાવરપ્લેમાં જ 105 રન ફટકારીને પંજાબના બોલરોની લાઈન-લેન્થ બગાડી નાખી હતી. અભિષેકે માત્ર 18 બોલમાં અડધી સદી પૂરી કરી હતી. એક સમયે લાગતું હતું કે સ્કોર 250 ને પાર કરી જશે, પરંતુ પંજાબના બોલરોએ વળતી લડત આપી હૈદરાબાદને 219 રને રોકી દીધું હતું. હેનરિક ક્લાસેને 39 અને ઇશાન કિશને 27 રનનું યોગદાન આપ્યું હતું.
શશાંક સિંહનો બોલિંગમાં ‘ડબલ ડોઝ’
જ્યારે હૈદરાબાદના ઓપનરો પંજાબને મેચમાંથી બહાર કરી રહ્યા હતા, ત્યારે કેપ્ટન શ્રેયસ ઐયરે શશાંક સિંહ પર ભરોસો મૂક્યો હતો. શશાંકે પોતાની જાદુઈ સ્પેલમાં ટ્રેવિસ હેડ અને ખતરનાક અભિષેક શર્માને આઉટ કરીને મેચનું પાસું પલ્ટી નાખ્યું હતું. તેણે 3 ઓવરમાં માત્ર 20 રન આપીને 2 મહત્વની વિકેટ ઝડપી હતી. અર્શદીપ સિંહે પણ બે વિકેટ લઈને હૈદરાબાદની રફ્તાર પર બ્રેક લગાવી હતી.
પંજાબનો ‘પાંચે આંગળીએ’ પ્રહાર
લક્ષ્યનો પીછો કરવા ઉતરેલી પંજાબની ટીમ શરૂઆતથી જ આક્રમક મૂડમાં હતી. યુવા ઓપનર પ્રિયાંશ આર્યએ માત્ર 16 બોલમાં અડધી સદી ફટકારીને મેદાનના ચારેય ખૂણે ચોગ્ગા-છગ્ગાની રમઝટ બોલાવી હતી. તેની સાથે પ્રભસિમરન સિંહે પણ 25 બોલમાં 51 રન બનાવીને જીતનો પાયો નાખ્યો હતો. મધ્યમાં જ્યારે વિકેટો પડી ત્યારે કેપ્ટન શ્રેયસ ઐયરે જવાબદારી સ્વીકારી હતી. ઐયરે 33 બોલમાં 5 છગ્ગા અને 5 ચોગ્ગા સાથે અણનમ 69 રન બનાવીને પોતાની ટીમને 7 બોલ બાકી રહેતા વિજય અપાવ્યો હતો.
હૈદરાબાદ માટે બોલિંગ બની ચિંતા
SRH માટે યુવા સ્પિનર શિવંગ કુમારે 3 વિકેટ લઈને લડત આપી હતી, પરંતુ અન્ય બોલરો રન રોકવામાં નિષ્ફળ રહ્યા હતા. હૈદરાબાદની આ ચાર મેચમાં ત્રીજી હાર છે. બીજી તરફ, પંજાબ કિંગ્સ અત્યાર સુધી અજેય રહીને પોઈન્ટ ટેબલમાં ટોચ પર પહોંચવા માટે મજબૂત દાવેદારી કરી રહી છે. મુલ્લાનપુરના પ્રેક્ષકો માટે આ મેચ પૈસા વસૂલ સાબિત થઈ હતી.