લખનૌ સુપર જાયન્ટ્સ (LSG) માટે આ સિઝન અત્યાર સુધી પડકારજનક રહી હતી, પરંતુ છેવટે ટીમે શાનદાર વાપસી કરી છે. સતત 6 મેચમાં હારનો સામનો કર્યા બાદ, ઋષભ પંતના નેતૃત્વમાં લખનૌએ પોતાની 10મી મેચમાં વર્તમાન ચેમ્પિયન રોયલ ચેલેન્જર્સ બેંગ્લુરુ (RCB) ને પરાજય આપ્યો છે. ડકવર્થ-લુઈસ (DLS) પદ્ધતિના આધારે લખનૌએ આ મેચ 9 રનથી જીતી લીધી છે. આ જીત છતાં પોઈન્ટ ટેબલમાં લખનૌની સ્થિતિમાં મોટો સુધારો થયો નથી, પરંતુ આ જીતે તેમની પ્લેઓફની આશાઓને ચોક્કસપણે બળ પૂરું પાડ્યું છે.

8 મેના રોજ લખનૌના એકાના સ્ટેડિયમ ખાતે રમાયેલી આ હાઈ-વોલ્ટેજ મેચમાં વરસાદે અનેકવાર ખલેલ પહોંચાડી હતી. વરસાદી વિઘ્નને કારણે મેચમાં 2 ઓવરનો કાપ મૂકવામાં આવ્યો હતો. પ્રથમ બેટિંગ કરતા લખનૌએ મિશેલ માર્શની શાનદાર સદીની મદદથી 209 રનનો જંગી સ્કોર ઉભો કર્યો હતો. ત્યારબાદ DLS પદ્ધતિ હેઠળ બેંગ્લોરને જીતવા માટે 213 રનનો સુધારેલો લક્ષ્યાંક આપવામાં આવ્યો હતો. જોકે, લખનૌના બોલર પ્રિન્સ યાદવની ઘાતક બોલિંગ સામે બેંગ્લોરની ટીમ નિર્ધારિત ઓવરમાં 203 રન જ બનાવી શકી હતી.

આ રોમાંચક જીત બાદ લખનૌના 10 મેચમાં કુલ 6 પોઈન્ટ થયા છે. પોઈન્ટની દ્રષ્ટિએ તેઓ મુંબઈ ઈન્ડિયન્સની બરાબરી પર છે, પરંતુ નબળા નેટ રન રેટને કારણે લખનૌ હજુ પણ 10મા ક્રમે છે. બીજી તરફ, બેંગ્લુરુએ આ સિઝનમાં પ્રથમ વખત સતત બીજી હારનો સામનો કરવો પડ્યો છે. 10 મેચમાં 12 પોઈન્ટ સાથે RCB હાલમાં ટેબલમાં ત્રીજા સ્થાને છે અને તેમણે ટોચ પર પહોંચવાની સુવર્ણ તક ગુમાવી દીધી છે.

હવે સૌની નજર આજે 8 મેના રોજ નવી દિલ્હીમાં રમાનારી દિલ્હી કેપિટલ્સ (DC) અને કોલકાતા નાઈટ રાઈડર્સ (KKR) વચ્ચેની મેચ પર છે. હાલમાં દિલ્હી 8 પોઈન્ટ સાથે સાતમા સ્થાને અને કોલકાતા 7 પોઈન્ટ સાથે આઠમા સ્થાને છે. જો દિલ્હી આ મેચ જીતશે તો 10 પોઈન્ટ સાથે સાતમા ક્રમે યથાવત રહેશે, પરંતુ જો કોલકાતા વિજય મેળવશે તો તે 9 પોઈન્ટ સાથે દિલ્હીને પછાડીને સાતમો ક્રમ હાંસલ કરી શકે છે.

IPL 2026 પોઈન્ટ ટેબલ