દુબઈ : મેન્સ ટી-20 ક્રિકેટ ક્ષેત્રે નંબર-વન ભારતીય ક્રિકેટ ટીમ માટે વર્ષ 2026 અત્યંત શુકનિયાળ સાબિત થયું છે, જેમાં ભારતે બે મોટી આંતરરાષ્ટ્રીય ટૂર્નામેન્ટમાં ઐતિહાસિક વિજય મેળવીને દેશનું નામ રોશન કર્યું છે. શનિવારે રમાયેલી એશિયન ગેમ્સની ટી-20 ક્રિકેટ સ્પર્ધામાં શ્રેયસ ઐયરના નેતૃત્વ હેઠળ ભારતીય ટીમે ગોલ્ડ મેડલ પોતાના નામે કર્યો હતો. આ ખાસ પ્રસંગે આઈસીસીના ચેરમેન જય શાહ મુખ્ય અતિથિ તરીકે ઉપસ્થિત રહ્યા હતા અને તેમણે વિજેતા ટીમના ખેલાડીઓને અભિનંદન પાઠવી ગોલ્ડ મેડલ સેરેમનીમાં હાજરી આપી હતી.

અગાઉ માર્ચ 2026માં સૂર્યકુમાર યાદવની કૅપ્ટન્સીમાં ભારતે આઈસીસી ટી-20 વર્લ્ડ કપ જીતીને સપાટો બોલાવ્યો હતો. અમદાવાદના નરેન્દ્ર મોદી સ્ટેડિયમ ખાતે રમાયેલી રોમાંચક ફાઈનલ મેચમાં ભારતે ન્યૂઝીલેન્ડને 96 રનથી હરાવીને ટ્રોફી પર કબજો જમાવ્યો હતો. એ વખતે પણ આઈસીસી ચેરમેન જય શાહના શુભહસ્તે કેપ્ટન સૂર્યકુમાર યાદવ અને ભારતીય ટીમને ગોલ્ડન ટ્રોફી એનાયત કરવામાં આવી હતી.

ટી-20 ફોર્મેટમાં ભારતીય ક્રિકેટરોએ પોતાના શાનદાર પ્રદર્શનથી વૈશ્વિક સ્તરે ભારતનો દબદબો ફરી એકવાર સાબિત કરી દીધો છે. એશિયન ગેમ્સમાં શ્રેયસ ઐયરની આગેવાનીમાં યુવા અને અનુભવી ખેલાડીઓના શ્રેષ્ઠ તાલમેલે ટીમને સુવર્ણચંદ્રક અપાવવામાં મહત્વની ભૂમિકા ભજવી હતી. મેડલ વિતરણ બાદ જય શાહે ખેલાડીઓ સાથે મુલાકાત કરીને તેમની આકરી મહેનત અને રમતભાવનાને બિરદાવી હતી.

જોકે, આ ભવ્ય વિજયો વચ્ચે ભૂતકાળના કેટલાક વિવાદો પણ સામે આવ્યા છે. ગયા વર્ષે રમાયેલા મેન્સ એશિયા કપમાં ભારતે સૂર્યકુમારના નેતૃત્વમાં ચેમ્પિયનપદ મેળવ્યું હતું, પરંતુ એશિયન ક્રિકેટ કાઉન્સિલના તત્કાલીન ચીફ અને પાકિસ્તાનના પ્રતિનિધિ મોહસિન નકવીના વિવાદાસ્પદ વલણને કારણે ભારતીય ટીમને ટ્રોફી મળી શકી નહોતી. ભારતીય ટીમે તેમના હાથે ટ્રોફી સ્વીકારવાનો ઇનકાર કર્યો હતો.

આ જ પ્રકારનો વિવાદ મહિલા એશિયા કપ વખતે પણ સર્જાયો હતો. જ્યારે ભારતીય મહિલા ટીમે એશિયા કપ જીત્યો ત્યારે પણ નકવી ટ્રોફી આપવા આવ્યા હતા, પરંતુ ભારતીય મહિલા ટીમે પણ ટ્રોફીનો અસ્વીકાર કરતા તેમણે પરત ફરવું પડ્યું હતું. આ તમામ વિવાદો છતાં ભારતીય ક્રિકેટ ટીમોએ મેદાન પર પોતાના ઉત્કૃષ્ટ પ્રદર્શનથી ટ્રોફી અને મેડલ જીતવાનું ચાલુ રાખ્યું છે.

હાલમાં ભારતીય ક્રિકેટ ટીમ માટે વિજયની આ શ્રેણીથી સમગ્ર દેશમાં ઉત્સાહનો માહોલ છે. ભવિષ્યમાં પણ ભારતીય ટીમ આંતરરાષ્ટ્રીય સ્તરે આવી જ રીતે સફળતાના નવા શિખરો સર કરશે અને દેશનું ગૌરવ વધારશે તેવી ક્રિકેટ ચાહકો આશા રાખી રહ્યા છે.