નાગોયા (જાપાન), તા.૦૨: જાપાનમાં રમાઈ રહેલી એશિયન ગેમ્સ ૨૦૨૬માં ભારતીય રમતવીરોનું શાનદાર પ્રદર્શન સતત જારી છે. શુક્રવારે યોજાયેલી સેપાકટાક્રો (Sepaktakraw) સ્પર્ધામાં પુરુષોની ક્વાડ્રન્ટ સેમીફાઇનલમાં ભારતીય ટીમે યજમાન જાપાન સામે જોરદાર સંઘર્ષ આપ્યા બાદ બ્રોન્ઝ મેડલ (કાંસ્યચંદ્રક) પોતાના નામે કર્યો છે.

 

જાપાન સામે સેમીફાઇનલમાં કાંટાની ટક્કર

 

નાગોયા ખાતે રમાયેલી અત્યંત રોમાંચક સેમીફાઇનલ મેચમાં ભારતીય ટીમને યજમાન જાપાન સામે ૧૨-૧૫, ૧૩-૧૫ થી ૦-૨ થી પરાજયનો સામનો કરવો પડ્યો હતો. ખાસ કરીને બીજા સેટમાં ભારતીય ટીમે અદ્ભુત પુનરાગમન કરીને એક સમયે સ્કોર ૧૩-૧૪ સુધી પહોંચાડી દીધો હતો અને જાપાની ટીમના પસીના છોડાવી દીધા હતા. જોકે, આખરી ક્ષણોમાં જાપાને સેટ પોતાના નામે કરી ફાઇનલમાં પ્રવેશ કર્યો હતો.

 

ગ્રુપ સ્ટેજમાં ભારતનું નિર્વિવાદ વર્ચસ્વ રહ્યું

 

સેમીફાઇનલ સુધીની સફરમાં ભારતીય પુરુષ ટીમે શાનદાર રમતનું પ્રદર્શન કર્યું હતું. ગ્રુપ A માં ભારતે પોતાની તમામ મેચો જીતીને ગ્રુપમાં ટોચનું સ્થાન પ્રાપ્ત કર્યું હતું:

 

• લાઓસ સામે: ૨-૦ થી વિજય

 

• વિયેતનામ સામે: ૨-૦ થી વિજય

 

• મ્યાનમાર સામે: ૨-૧ થી રોમાંચક જીત

 

બીજી તરફ, યજમાન જાપાનની ટીમ ગ્રુપ B માં બીજા ક્રમે રહીને સેમીફાઇનલમાં પહોંચી હતી.

 

મહિલા ટીમનો ગ્રુપ સ્ટેજમાં પરાજય

 

બીજી તરફ, ભારતની મહિલા સેપાકટાક્રો ટીમને ગ્રુપ A ના પ્રારંભિક મુકાબલામાં મજબૂત થાઈલેન્ડ સામે ૦-૨ (૧૦-૧૫, ૪-૧૫) થી હારનો સામનો કરવો પડ્યો હતો. થાઈલેન્ડે સમગ્ર મેચ દરમિયાન સારું વર્ચસ્વ જાળવી રાખ્યું હતું.

 

ભારતીય પુરુષ સેપાકટાક્રો ટીમે મેળવેલો આ બ્રોન્ઝ મેડલ દેશ માટે એક મોટી રમતગમતની સિદ્ધિ માનવામાં આવે છે અને આખી ટીમ પર પ્રશંસાની વર્ષા થઈ રહી છે.