કકામિગહરા (જાપાન), તા.02: જાપાનના કકામિગહરા ખાતે રમાઈ રહેલી એશિયન ગેમ્સમાં શુક્રવારે સાંજે ભારત અને ચીન વચ્ચેની વિમેન્સ હોકી ફાઇનલ મેચ કલ્પના પણ ન કરી હોય તેવા અણધાર્યા કારણસર ૪૫ મિનિટ મોડી શરૂ થતાં હોકી ચાહકોમાં આશ્ચર્ય ફેલાઈ ગયું હતું. જાપાનના સ્થાનિક સમય અનુસાર સાંજે ૭:૦૦ વાગ્યે (ભારતીય સમય મુજબ બપોરે ૩:૩૦ વાગ્યે) રમાનારી આ મહામુકાબલાની મેચ આયોજકો દ્વારા પોણો કલાક પાછી ઠેલવી પડી હતી.

ટ્રાફિક જામમાં અટવાઈ બંને ટીમોની બસ

આ વિલંબ પાછળનું મુખ્ય કારણ કોઈ ટેકનિકલ ખામી કે ખરાબ હવામાન નહીં, પરંતુ રસ્તા પર થયેલો અકસ્માત અને ટ્રાફિક જામ હતો. કકામિગહરાના ગિફુ પર્ફેક્ચ્યૂરલ ગ્રીન સ્ટેડિયમ તરફ આવી રહેલી બંને ટીમોની બસ વચ્ચેના માર્ગમાં એક અન્ય વાહન અકસ્માત સર્જાયો હતો. આ દુર્ઘટનાને કારણે રસ્તા પર ભારે ટ્રાફિક જામ થઈ જતાં ખેલાડીઓ સમયસર સ્ટેડિયમ પહોંચી શક્યા નહોતા. જેથી આયોજકોએ તાત્કાલિક નિર્ણય લઈને મેચ સાંજે ૪:૧૫ વાગ્યે (IST) શરૂ કરવાની જાહેરાત કરી હતી.

૪૪ વર્ષ પછી ઇતિહાસ રચવા ભારત સજ્જ

ડિફેન્ડિંગ ચેમ્પિયન ચીન સામેની આ ફાઇનલ મેચ ભારત માટે અત્યંત મહત્વપૂર્ણ છે. ભારત પાસે ૪૪ વર્ષના લાંબા અંતરાલ બાદ ફરી એકવાર વિમેન્સ હોકીમાં ગોલ્ડ મેડલ પોતાના નામે કરવાનો સુવર્ણ અવસર છે. ગિફુ પર્ફેક્ચ્યૂરલ ગ્રીન સ્ટેડિયમ ખાતે જ પુરુષોની તમામ મેચો રમાઈ ચૂકી છે, ત્યારે આ હાઇ-વોલ્ટેજ ફાઇનલ મુકાબલા માટે ભારતભરના રમતપ્રેમીઓમાં ભારે ઉત્સાહ અને રોમાંચ જોવા મળી રહ્યો છે.