જયપુર, તા.૦૯: આઈપીએલ ૨૦2૬માં દરરોજ નવા રેકોર્ડ બની રહ્યા છે, પરંતુ આજે જયપુરના મેદાન પર જે જોવા મળ્યું તેણે ક્રિકેટના દિગ્ગજોને પણ વિચારતા કરી દીધા છે. રાજસ્થાન રોયલ્સ અને ગુજરાત ટાઇટન્સ વચ્ચેની મેચમાં ભલે સ્કોરબોર્ડ પર રનનો પહાડ હોય, પરંતુ ખરી ‘લાઈમલાઈટ’ તો ૧૫ વર્ષના યુવા બેટ્સમેન વૈભવ સૂર્યવંશીએ ચોરી લીધી છે. વૈભવે પાવર પ્લેમાં છગ્ગાનો એવો વરસાદ કર્યો કે આઈપીએલના ઈતિહાસનો એક મોટો રેકોર્ડ તેના નામે થઈ ગયો છે.
૧૬ બોલ, ૩૬ રન અને રબાડા પર ‘પ્રહાર’
ગુજરાત ટાઇટન્સના ૨૨૯ રનના વિશાળ લક્ષ્યાંકનો પીછો કરવા ઉતરેલી રાજસ્થાન રોયલ્સની શરૂઆત તોફાની રહી હતી. વૈભવ સૂર્યવંશીએ મેદાન પર આવતાની સાથે જ આક્રમક વલણ અપનાવ્યું હતું. તેણે માત્ર ૧૬ બોલમાં ૩૬ રનની આક્રમક ઇનિંગ રમી, જેમાં ૩ ચોગ્ગા અને ૩ લાંબી સિક્સરનો સમાવેશ થાય છે. ખાસ કરીને બીજી ઓવરમાં દુનિયાના સૌથી ઘાતક બોલરોમાંના એક કાગીસો રબાડા પર તેણે જે રીતે સતત બે છગ્ગા ફટકાર્યા, તે જોઈને આખું સ્ટેડિયમ ડોલી ઉઠ્યું હતું.
અભિષેક શર્માનો રેકોર્ડ ધ્વસ્ત
વૈભવ સૂર્યવંશીએ આ મેચમાં ૩ છગ્ગા ફટકારતાની સાથે જ એક અદભૂત સિદ્ધિ હાંસલ કરી છે. તેણે એક જ આઈપીએલ સિઝનમાં પાવર પ્લે (પહેલી ૬ ઓવર) દરમિયાન સૌથી વધુ છગ્ગા મારવાનો રેકોર્ડ પોતાના નામે કરી લીધો છે. અત્યાર સુધી આ રેકોર્ડ અભિષેક શર્માના નામે હતો, જેણે ૨૦૨૪માં ૨૯ છગ્ગા ફટકાર્યા હતા. વૈભવે આ સિઝનમાં પાવર પ્લેમાં કુલ ૩૦ છગ્ગા પૂરા કરીને અભિષેકને બીજા ક્રમે ધકેલી દીધો છે.
દિગ્ગજોની યાદીમાં ટોચ પર
માત્ર અભિષેક શર્મા જ નહીં, પરંતુ વૈભવે સનથ જયસૂર્યા, ટ્રેવિસ હેડ અને યશસ્વી જયસ્વાલ જેવા ખેલાડીઓને પણ પાછળ છોડી દીધા છે, જેમના નામે પાવર પ્લેમાં ૨૨-૨૨ છગ્ગાનો રેકોર્ડ હતો. ભારતનો આ યુવા બેટ્સમેન જે રીતે નીડર થઈને બેટિંગ કરી રહ્યો છે, તે જોતા ભવિષ્યમાં તે ભારતીય ટીમનો મોટો સ્ટાર બનશે તેવી અપેક્ષાઓ સેવાઈ રહી છે.
ભલે ગુજરાત ટાઇટન્સે પહાડ જેવો સ્કોર બનાવ્યો હોય, પણ પાવર પ્લેમાં વૈભવની આ તોફાની બેટિંગે મેચમાં રોમાંચ જાળવી રાખ્યો છે. જયપુરના સ્ટેડિયમમાં આજે ફરી એકવાર ‘યંગ ઈન્ડિયા’ની તાકાત જોવા મળી છે.